कञ्चनपुरमे कोरोना संक्रमित बह्रटी

पहुरा समाचारदाता
कञ्चनपुर, २१ पुस । कञ्चनपुरमे कोरोना संक्रमितके संख्या बह्रे लागल बा । भारतमे कोरोनाके संक्रमण बह्रे लागलपाछे नेपाल अउइयाके संख्या बह्रलसंगे यहाँ फेन उ संख्यामे वृद्धि हुइल हो ।

जिल्ला स्वास्थ्य कार्यालयके अनुसार कोरोनाके सक्रिय संक्रमितके संख्या ४१ पुगल बा । मंगरके किल १५ जनहनमे कोरोना संक्रमण पुष्टि हुइल बा । भीमदत्त नगरपालिकामे ६, कृष्णपुर नगरपालिकामे एक तथा पश्चिमी सीमानाका हुइटी भारतसे नेपाल प्रवेश करल आठ जनहनमे संक्रमण डेखल बा ।

एन्टिजेन विधिसे करल परीक्षणमे नौ जनहनके नतिजा पोजेटिभ आइल बा कलेसे पिसीआर विधिसे करल परीक्षणमे ६ जनहनके नतिजा पोजेटिभ आइल बा । कोरोना परीक्षणके नतिजा पोजेटिभ आइल मध्ये एक जनहनके महाकाली अस्पतालके आइसोलेशनमे बाटै । बाँकी सक्कु जाने होमआइसोलेशनमे रहल बाटै ।

ओस्टके सीमानाके त्रिनगर हुइटी नेपाल भित्रल एन्टिजेन विधिसे कोरोना परीक्षण करलमे १६ जनहनके नतिजा पोजेटिभ आइल बा । हालसम कञ्चनपुरमे नौ हजार ८५ जनहनमे कोरोना पोजेटिभ पाइल बा । हालसम आठ हजार ८२३ जाने चोखाइल बाटै ।

हालसम २०५ जनहनके कोरोनासे मृत्यु हुइल बा । मंगरके किल सीमानाका गड्डाचौकी हुइटी नेपाल भित्रल यात्रुके संख्या ४८२ रहल बा । पुरुष २९९, महिला १०० ओ बालबालिका ३२ रहल बाटै । नेपालसे भारतओर जउइयाके संख्या ४३५ रहल बा । उहे अवधिमे सीमानाका त्रिनगर हुइटी नेपाल आइल यात्रुके संख्या ३०९ तथा भारत ओर जउइयाके संख्या २५९ रहल बा ।