ज्येष्ठ नागरिकसहित लक्षित वर्गहे ब्ल्यांकेट
पहुरा समाचारदाता
हसुलिया, २१ पुस । जाडसे जनजीवन प्रभावित हुइटी रहल बेला कैलालीके कैलारी गाउँपालिका–३ के वडा कार्यालयसे ज्येष्ठ नागरिकसहित लक्षित वर्गहे एक/एक ठो ब्ल्याङ्केट वितरण करले बा ।
जाडसे बच्ना सहयोग पुग्ना कहटी वडा कार्यालयसे लक्षित वर्गहे सम्मान कार्यक्रमके आयोजना कैके ब्ल्यांकेट वितरण करल हो । ज्येष्ठ नागरिक, आपाङ्गता रहल व्यक्ति, एकल महिलाहे ब्ल्यांकेट डेहल वडा अध्यक्ष कैलाश चौधरी जानकारी डेलै ।
कार्यक्रममे बर्का पहुना रहल कैलारी गाउँपालिकाके अध्यक्ष लाजुराम चौधरी, खास पहुना रहल उपाध्यक्ष लक्ष्मी सत्गौंवा, वडा सदस्यसे ब्ल्यांकेट हस्तान्तरण करल रहिट । ब्ल्यांकेट पाइलपाछे ज्येष्ठ नागरिक लगायत विपन्न व्यक्ति खुशी हुइल बाटै ।
चालू आर्थिक बरसमे लक्षित वर्गहे सम्मान कार्यक्रमके लाग वडा कार्यालयसे दुई लाख ८५ हजार रुपैयाँ बजेट विनियोजन करल रहे । उहे पैसासे ब्ल्यांकेट खरिद कैके ४५० जनहनहे वितरण करल वडा अध्यक्ष चौधरी बटैलै ।‘आज ब्ल्यांकेट लेहे उपस्थित हुइ नैसेकलहे बिफेक रोज वितरण करब’, उहाँ कहलै ।
ओस्टके, वडामे रहल स्वास्थ्य स्वयम् सेविकाहे फेन उहाँहुक्रनके ड्रेसमे मिल्ना मेरके लगरा डेना तयारी करल वडा अध्यक्ष चौधरी बटैलै ।‘ओकर लाग ३० हजार रुपैयाँ बजेटके व्यवस्था करले बाटी’, उहाँ कहलै । वडा नम्बर ३ मे १२ जाने महिला स्वास्थ्य स्वयम्सेविका कार्यरत रहल बाटै ।
