महिलाहुकनहे कानूनी साक्षरता अभिमुखीकरण
पहुरा समाचारदाता
बर्दिया, २१ पुस । महिलाहुकनके सशक्तिकरण तथा कानूनबारे जानकार बनाइक लाग ग्रामीण महिलाहुकनहे कानूनी साक्षरता अभिमुखीकरण करल बा ।
युनिक नेपालसे करल उ साक्षरता अभिमुखिकरण राजापुर नगरपालिकाके वडा नं. २, बरगदहीके महिलाहुकनहे करल हो । कानूनी साक्षरता अभिमुखीकरणमे वडा तथा नगरपालिकासे डेना सेवा, घरायसी लिखत, अंशवण्डा तथा जिउनी अंश, अपुताली तथा दान बकस, विवाह दर्ता वहुविवाह सम्बन्धी कसुर, सम्बन्ध विच्छेद ओ यौन दुव्र्यवहार तथा जबरजस्ती करणी ओ कानूनी उपचार सम्बन्धमे अभिमुखीकरण करल रहे । अभिमुखीकरण कार्यक्रमहे अधिवक्ताद्धय सन्तराम धारकटुवाथारु ओ महादेव चौधरी सहजीकरण करले रहिट ।
युनिक नेपालके अध्यक्ष प्रिमबहादुर थारुके अध्यक्षमे हुइल उ अभिमुखीकरणके समापन करटी वहाँ महिलाहुक्रे कानूनके बारेमे जानकार हुइना आवश्यक रहल बटैलै । महिलाहुक्रे कानूनके बारेमे जानकार हुइलेसे अपने पैना अधिकार सहजरुपमे प्राप्त करे सेक्ना बटैलै ।
