भारतसे नेपाल लौटुइया बह्रलै

तीन दिन यहोर कोरोना संक्रमणदर उच्च

पहुरा समाचारदाता
धनगढी, २२ पुस । भारतके दिल्ली, कर्नाटक, गुजरात लगायतके सहरमे कोरोना नयाँ भेरिएन्ट अमिक्रोन संक्रमण बह्रे लागलपाछे काम छोरके घर लौटुइया नेपालीके संख्याफे बह्रल बा ।

कैलालीसंगे जोरल गौरीफण्टा नाकामे धारल सशस्त्र प्रहरी पोष्टके अनुसार ३ दिन यहोर दैनिक रुपमे भारतसे अउइययाके संख्या बह्रल हो । पुस महिनामे गौरीफण्टा नाकाहुके ६ हजार ५ सय ८ जाने भिटरल बटै । सुदूरपश्चिममे मनैना माघी पर्वहे लक्षित करकेफे ढेर नेपाली अइटी रहल बटै ।

तीन दिन आघे दैनिक २ सय ५० से ३ सय आइल तथ्यांकसे डेखैले बा । ३ दिन यहोर दैनिक ३ सयसे ५ सयसम भिटरी रहल शसस्त्र प्रहरीके तथ्यांकसे डेखैले बा । मंगर केल गौरीफण्टा नाकासे ५ सय ४० जाने भिटरल बटै । पछिल्का ३ दिनमे गौरीफण्टा नाकामे धारल स्वास्थ्य हेल्थ डेस्कमे ६० जनहनमे कोरोना एन्टिजन पोजेटिम पुष्टि हुइल बा ।

हेल्थ डेस्कमे खटल ल्याव टेक्निसियन जयराज ढुङगानाके अनुसार पुस १९ गते १ सय ९६ जानेक एन्टिजन टेस्ट हुइलमे ८ जनहनमे पोजेटिभ डेखल हो । ओस्टेक पुस २० गते ३ सय ९५ जनहनमे एन्टिजन परीक्षण करलमे २३ जनहनमे पोजेटिभ डेखल हो । ओस्टेक पुष २१ गते २ सय ६५ जनहनमे एन्टिजन परीक्षण करलमे २३ जनहनमे पोजेटिभ डेखल हो ।

एन्टिजन पोजेटिभ डेखलमे धनगढी उपमहानगरपालिकाके कनरीमे रहल आईसुलेसनमे रख्न करल ढुङगाना बटैलै । ‘भारतसे आइल सक्कु व्यक्तिहुकनके कोरोना एन्टिजन परीक्षण हुइठ, उहाँ कहलै ‘लक्षणसहित हुइलेसे सेती प्रादेशिक अस्पतालमे लैजैना कहलै । लक्षण नइरहलहुकन कनरी आईसुलेसनमे लेना करल बा’ गौरीफण्टा नाकामे १८ जानेक टोलि खटाइल बा । २ जाने कार्यालय सहयोगी, ३ जाने तथ्यांक अपडेट ओ १४ जाने स्वस्थ्यकर्मीहुकनके टोलि रहल बा ।

स्वस्थ्यकर्मीहुकनके टोलि सिफ्ट अनुसार काम कैना करल बा । पछिल्का समय सीमा चेक जाँचमेफे कडाई करल बा । भारतके व्याङलोरसे आइल गौरीफण्टा नाकामे भेटल जंगबहादुर बोहरा भारतमे स्वास्थ्य क्षेत्रमे कडाई करल बा । ओटरा नेपालमे नइकरल बटैलै । उहाँक घर डडेल्धुराके प्रशुराम नगरपालिकामे हो । ‘भारतमे कोरोना संक्रमण फैले नइडेहक लाग जौन रुपमे कडाई करल बा । नेपालमे ओटरल करल नइडेखठ, बोहरा कहलै । ‘भारतके नागरिक सचेत हुइल ओरसेफे हुई सेकी । नेपालमे ढेर लापरवाही करल विल्गाइठ ।’

प्रदेशमे फेर बह्रे लागल कोरोना

सुदूरपश्चिम प्रदेशमे फेर कोरोना संक्रमणदर उच्च डेखाई लागल बा । भारतसे नेपालीहुक्रे लौटना क्रम बढलसंगे संक्रमण बह्रल हो ।

प्रदेशमे बुधकेल ५५ जाने संक्रमित ठपल हुइल बटै । एन्टिजेन विधिसे परीक्षण करेबेर ४६ ओ आरटी पीसीआर विधिसे नौ करके ५५ जनहनमे संक्रमण पुष्टि हुइल हो । मंगर केल ४० जाने, सोम्मार २३ जाने संक्रमित ठपल रहिट । ओ यी संगे सुदूरपश्चिम प्रदेशभर सक्रिय संक्रमितके संख्या १६२ पुगल बा । प्रदेशके कैलालीमे सबसे ढेर ९२, कञ्चनपुरमे ५३, बैतडीमे १२, दार्चुलामे दुई, बझांग, बाजुरा ओ डडेल्धुरामे एक÷एक जाने सक्रिय संक्रमित रहल प्रादेशिक स्वास्थ्य निर्देशनालय जानकारी डेले बा ।

कोरोना भाइरसके नयाँ भेरियन्ट ओमिक्रोनके त्रास बह्रटी रहल बेला सुदूरपश्चिम प्रदेशमे सक्रिय संक्रमितके संख्याफे बह्रे लागल हो । जिल्ला स्वास्थ्य कार्यालयके अनुसार कोरोनाके सक्रिय संक्रमितके संख्या ५३ जाने पुगलपाछे त्रास फैलल बा ।

कञ्चनपुरमे परीक्षणके नतिजा पोजेटिभ आइल मन्से एक जाने महाकाली अस्पतालके आइसोलेशनमे बटै । बाँकी सक्कु होमआइसोलेशनमे बटै । हालसम कञ्चनपुरमे नौ हजार ८५ जनहनमे कोरोना संक्रमण पुष्टि हुसेकल बा । संक्रमित मन्से आठ हजार ८ सय २३ जाने ठिक हुइल बटै ।

कोरोना संक्रमणके कारण कञ्चनपुरमे २ सय ५ जानेक मृत्यु हुइल बा । सीमा नाकामे खोप भारतसे आइलहुकनहे गौरीफण्टा सीमामे खोप लगैना व्यवस्था करल बा ।

धनगढी उपमहानगरपालिकासे सीमामे कर्मचारी खटाके अगहन ९ गतेसे खोप लगैटी रहल हो । ‘भारतसे आइल व्यक्तिहुक्रे खोप लगाइल नइहो कलेसे खोप लगैना करल बटी, सीमामे खटाइल हेल्थ डेस्क इन्चार्ज दिनेश ठकुल्ला कहलै । ‘अगहन केल एक हजार ७२ जानेक खोप लगैले बटी ।’

सीमा भेरोसिल ओ एस्ट्राजेने दुनु मेरिक खोप लगैटी रहल हो । ‘पहिल खोप लगाइलहुकनहे दुसरा खोप ओ कौनोफे खोप नइलगाइलहुकनहे पहिल खोप लगैटी रहल हो ।’ पुस २१ गते सम एक हजार ४ सय ३४ जाने खोप लगैले बटै ।