कैलालीमे साढे २३ हजार मतदाता ठप्लैं

पहुरा समाचारदाता
धनगढी, २२ पुस । कैलाली जिल्लामे मतदाताके संख्या ५ लाख २१ हजार नाघल बा । पुस १८ गतेसम कैलाली जिल्लामे ५ लाख, २१ हजार ५ सय ५५ जाने मतदातासे मतदाता नामावलीमे नाम दर्ता कराइल सुदूरपश्चिम प्रदेश निर्वाचन कार्यालय धनगढी जनैले बा ।

पाछेकचो जिल्लाके २ ठो इलाका प्रशासन कार्यालय, जिल्ला प्रशासन कार्यालय ओ प्रदेश निर्वाचन कार्यालयसे गैल साउन ४ गतेसे तथा जिल्लाके १० ठो स्थानीय तहमे अगहन १७ गतेसे पुस १८ गतेसम मतदाता नामावली संकलन करल रहे ।

यी अवधिमे पुस १८ गतेसमके तथ्यांक हेरलेसे कैलाली जिल्लामे २३ हजार ४ सय ५६ जाने मतदाता थपल ओ यीसँगे कैलालीमे मतदाताके संख्या ५ लाख, २१ हजार ५ सय ५५ पुगल प्रदेश निर्वाचन कार्यालय धनगढीके प्रमुख प्रेमराज भट्ट जानकारी डेलैं ।

स्थानीय तहमे मतदाता नामावली दर्ता करना क्रम रुक्लेसे फेन इलाका प्रशासन कार्यालय टीकापुर ओ सुखड, जिल्ला प्रशासन कार्यालय कैलाली ओ प्रदेश निर्वाचन कार्यालय धनगढीमे निर्वाचन घोषणा हुइना मितिसम मतदाता नामावलीमे नाम दर्ता करैना काम जारी रहना हुइल ओरसे छुटल नागरिकहुकनहे लग्गेक पायक पर्ना स्थानमे जाके नाम दर्ता करैना समेत प्रमुख भट्ट आग्रह करलैं ।

मतदाता नामावलीमे नाम दर्ता करैना काम जारी रहल निर्वाचन कार्यालय धनगढी जनैले बा ।