धनगढी उपमहानगर स्तरीय भल्मन्साके संयोजकमे सरोज

पहुरा समाचारदाता
धनगढी, २३ पुस । धनगढी उपमहानगरपालिका स्तरीय भल्मन्साहुकनके तदर्थके समितिके संयोजक सरोज चौधरी चयन हुइल बटै ।

विफेक धनगढीमे नगरपालिका स्तरीय पहिल भेलासे सरोज चौधरीके संयोजकत्वमे ११ सदस्यीय तदर्थ समिति चयन करल हो । समितिके सचिवमे रोहित चौधरी चयन हुइल बटै । ओस्टेक सदस्यमे जोगीलाल चौधरी, सन्तकुमार चौधरी, विन्तीराम चौधरी, कविता राना, रामनारायण चौधरी, फागुराम चौधरी, लबरु राना, तेजराम चौधरी ओ भोजराम राना रहल बटै ।

पहिल भेला थारु नागरिक समाज कैलालीके सदस्य बुन्दीलाल चौधरी भल्मन्साहुक्रे समाजमे निस्वार्थ सेवा डेटी रहल ओर परम्पगत चल्टी आइल लोकतान्त्रिक पद्धति रहल ओरसे राज्यसे कानूनी मान्यता डेहे पर्ना बटैलै ।

धनगढी–५ तारानगरके भल्मन्सा गोठुराम चौधरी भल्मन्साहुक्रे आब सामाजिक कार्यसंग्गे कुरुति हटैनाओर ध्यान जाई पर्ना बटैलै । नगरस्तरीय तदर्थ समितिके सचिव तथा बाँसखेडाके भल्मन्सा रोहितकुमार चौधरी समितिसे भल्मन्साहुकनके लाग ऐन बनाके आघे बह्रना बटैलै । उहाँ कहलै, भल्मन्सा भोजकाज, मरणीकरणीसे लेके बेठबेगारी लगायत सामाजिक कार्यमे निशुल्क सेवा प्रदान करटी बटै ।