कोरोना संक्रमित दोहोरो बृद्धि
प्रदेशमे एक्के दिनमे १२० संक्रमित ठप्लै
पहुरा समाचारदाता
धनगढी, २२ पुस । सुदूरपश्चिम प्रदेशमे पछिल्का ४ दिन यहोर कोरोना संक्रमित संख्या दोहोरो अंकसे बृद्धि हुइटी रहल बटै ।
भारतसे ओमिक्रोनके संक्रमित बह्रलपाछे वहाँसे नेपाली स्वदेश लौटना क्रम बह्रलसंगे यहाँ कोरोना संक्रमितफे बह्रे लागल हो । सामाजिक विकास मन्त्रालय स्वास्थ्य निर्देशनालयसे डेहल जानकारी अनुसार विफेक रोज एन्टीजेन ओ आरटी पीसिआरके रिपोर्टमे १ सय २० जाने कोरोना संक्रमित ठपल बटै ।
१३ सय २७ जानेक एन्टीजेन विधिसे परिक्षण करेबेर १ सय ८ जानेक कोरोना पोजेटिभ डेखल बा । कलेसे ४१ जानेक आरटी पीसिआर विधिसे परिक्षण करेबेर १२ जानेकमे संक्रमण पुष्टि हुइल मन्त्रालय जनैले बा । ओस्टेक विफेक रिपोर्ट अनुसार पछिल्का २४ घण्टामे ६ जाने ठिक हुइल बटै ।
सुदूरपश्चिम प्रदेशमे कोरोना सक्रिय संक्रमित २ सय ५१ पुगल बटै । विफेक रोज सुदूरपश्चिमके टमान नाकासे १५ सय १० जाने नेपाल भिटरल बटै । जेम्ने गडडा चौकीसे ७८८ जाने, गौरीफन्टा नाकासे ६३८, झुलाघाटसे ७६, पुलघाटसे ८ जाने नेपाल भिटरल बटै ।
