सुदूरपश्चिममे सतर्कता बह्रागैल

पहुरा समाचारदाता
धनगढी, २३ पुस । सुदूरपश्चिम प्रदेशके जिल्लामे दिनहुँ कोरोना संक्रमितके संख्या बह्रटी गैल बा । भारतके राजधानी दिल्लीमे कोरोनाके लावा भेरियन्ट ओमिक्रोन तीव्र रुपमे फैलल्संगे यकर प्रभाव इ प्रदेशमे फेन डेखल हो ।

हाल यहाँके नाकासे अउइया अधिकांशमे कोरोना पुष्टि हुइ लागल स्वास्थ्य निर्देशनालय जनैले बा । बिफेक रोज किल इ प्रदेशमे १२० जनहनमे संक्रमण पुष्टि हुइल बा । इहीसे आघे अँठ्वारके पहिल दिन अँट्वारके पाँच, सोम्मारके २८, मंगरके ४० ओ बुधके ५५ जनहनमे कोरोना पुष्टि हुइल रहे ।

बैतडीके झुलाघाट, दार्चुलाके पुलघाट, जौलजिवी, कञ्चनपुरके गड्डाचौकी ओ कैलालीके त्रिनगर नाकासे स्वदेश अउइयाके क्रम बह्रल हो । भारतमे दिल्ली, कर्नाटक, गुजरातलगायत सहरमे संक्रमण बह्रे लागलपाछे काम छोरके घर अृृउइया नेपालीके संख्या फेन बह्रटी रहल ओरसे यहाँ फेन ‘ओमिक्रोन’के उच्च जोखिम रहल जनाइल बा ।

सीमा नाकामे स्वास्थ्य जाँचमे कडाइ करल बा । सीमानाकामे हेल्थ डेस्क स्थापना कैके एन्टीजेन परीक्षणमार्फत परीक्षणके काम हुइटी रहल स्वास्थ्य कार्यालय बैतडीके प्रमुख योगेशप्रसाद भट्ट जानकारी डेलै । उहाँ कहलै, “जोखिम रोकक् लाग सीमामे परीक्षण कैना करल ओ पोजेटिभ आइलहे होम आइसोलेसन रख्ना करल बा ।”

यकर साथे जिल्ला प्रशासन कार्यालय बैतडीसे यातायात, विद्यालय ओ भीडभाड हुइना स्थानमे जनस्वास्थ्यके मापदण्डके अनिवार्य पालना कैना कहलृे बा । ओमिक्रोनके जोखिम रहल ओरसे कोरोनाविरुद्धके खोप अभियान तीव्र रुपमे आघे बह्राइल सुदूरपश्चिम प्रदेश स्वास्थ्य निर्देशनालयके कोभिड–१९ सम्पर्क व्यक्ति हेमराज जोशी जानकारी डेलै । उहाँ कहलै, “सुदूरपश्चिम प्रदेश उच्च जोखिममे रहल ओरसे भारतसे अउइयानके कोरोना परीक्षण ओ खोप लगैना प्रबन्ध मिलाइल बा ।”

यकर साथे ओमिक्रोन रोकथाम ओ नियन्त्रणके लाग कोरोनाविरुद्धके खोप अभियानहे बह्राइल बा । इ प्रदेशमे हालसम ५० प्रतिशत ढिउर खोप पासेकल बाटै । यकर साथे सीमानाकामे थप प्रभावकारी ढंगसे स्वास्थ्य परीक्षण ओ होल्डिङ सेन्टरके प्रबन्ध करल ओ विगतसे थप सबल व्यवस्थापनके लाग स्वास्थ्यके टोली खटाइल बा ।

भारतसँग खुल्ला सीमा नाका रहल कारण संक्रमण नियन्त्रणमे कुछ चुनौती रहल निर्देशनालय जनैले बा । विगतमे अवैध नाकासे भारतसे मनै अइना करल ओरसे जोखिम बह्रल ओरसे आब फेन अवैध नाकासे आइ नैडेना चुनौती हुइना डेखल बा । प्रदेशमे हालसम चार लाख ३५ हजार ७२५ जनहनके कोरोना परीक्षण करलमे ४८ हजार ५१९ जनहनमे सङ्क्रमण होसेकल बा । संक्रमणके कारण इ प्रदेशमे ६१४ जनहनके ज्यान जासेकल बा ।

इ प्रदेशके टमान आठ प्रयोगशालामार्फत पिसिआर परीक्षण ओ प्रदेशके सक्कु जिल्लामे एन्टीजेनमार्फत फेन परीक्षण कार्य जारी रहल बा । यहाँके सक्कु जिल्लामे कैके ३९२ आइसोलेसन शय्या, १३४ एचडियु, १२६ कोभिड एचडियु, ६३ आइसियु, ४८ कोभिड आइसियु श्य्या,४५ भेन्टिलेटर ओ २६ कोभिड भेन्टिलेटर तयारी अवस्थामे राखल बावै । प्रदेशके सक्कु स्थानीय तहमे हाल कोरोनाविरुद्धके खोप अभियान फेन जारी र हल बा । सरकारसे सक्कु जनहनहे खोप लगैना फेन आग्रह करले बा ।