मोटरसाइकल दुर्घटनामे ३ के ज्यान गैल
पहुरा समाचारदाता
धनगढी, २३ पुस । कैलालीमे हुइल सवारी दुर्घटनामे अक्के दिन तीन जनहनके मृत्यु हुइल बा । बिफेक हुइल तीनठो सवारी दुर्घटनामे तीन जनहनके मृत्यु हुइल हो ।
बिफेक सकारे साढे ८ बजे जिल्लाके लम्कीचुहा नगरपालिका–७ मे मोटरसाइकल अनियन्त्रीत होके एकजनहनके मृत्यु हुइल रहे । २७ वर्षीय स्थानीय रमेश चौधरीसे चलाइल से३प ६१३५ नम्बरके मोटरसाइकल अनियन्त्रीत होके सडकसे टरे गैल रहे । उहे मोटरसाइकलसे डबके चौधरीके मृत्यु हुइल जिल्ला प्रहरी कार्यालय कैलाली जनैले बा ।
उहे दिन धनगढी उपमहानगरपालिका–३ त्रिनगर भन्सारमे सु.प.प्र.०१–००१ख २८५६ नम्बरके ट्रक पार्किङ कैना क्रममे ६५ वर्षीया श्रीमाया गुरुङ गम्भीर घाहिल हुइल रही । ओहककान माया मेट्रो अस्पताल धनगढीमे उपचारके क्रममे मृत्यु हुइल बा ।
बिफेक रात १० बजे ट्याक्टरके ठक्करसे थप एकजनहनके मृत्यु हुइल रहे । कैलाली गोदावरी नगरपालिका वडा नम्बर ९ धनचौरीस्थित भित्री सडक खण्डमे उत्तरसे दख्खिन ओर जैटी रहल रा.१ त. ४६५३ नम्बरके ट्याक्टरसे कञ्चनपुर कृष्णपुरके करन भट्टराइहे ठक्कर डेहेबर ओहकान घटनास्थलमे मृत्यु हुइल रहे ।
