सुदूरपश्चिम विश्वविद्यालयके प्राध्यापक आन्दोलित
विद्यार्थी संगठनके तालाबन्दी
पहुरा समाचारदाता
धनगढी, २३ पुस । सुदूरपश्चिम विश्वविद्यालयके प्राध्यापक आन्दोलनमे उत्रल बाटै ।
विश्वविद्यालय प्राध्यापक संघमे आवद्ध प्राध्यापकहुक्रे विश्वविद्यालयमे डेखल विद्यमान गतिरोध अन्त्य कैके समायोजन प्रकृया ओ प्राध्यापकके वृति विकाससँग सम्बन्धी सम्पूर्ण प्रक्रिया कार्यान्वयनके माग कैटी रिले अनसनमे बैठल हुइट ।
सुदूरपश्चिम विश्वविद्यालय प्राध्यापक संघके सभापति उत्तम थापा नवौं सिनेट बैठकमे करल निर्णय प्राध्यापक कर्मचारीविरुद्ध रहल ओरसे आन्दोलनमे उत्रे परल बटैलै । ‘सिनेट बैठकके एजेण्डामे मोर सहमति नैहो’ उहाँ कहलै, ‘सहमति विरुद्धमे निर्णय करल बावै ।’
एजेण्डा अध्ययन कैना मौका नैडेके कार्यकारीसे गुमराहमे राखल उहाँके अरोप रहल बा । सिनेटके निर्णय अपारदर्शी रहल फेन उहाँ आरोप लगैलै । प्राध्यापक संघक्े महासचिव खेमराज सुवेदी पदाधिकारीसे अन्याय करल उल्लेख कैटी उ विरुद्धमे आन्दोलित हुइल बटैलै । भागबण्डाके लाग नैहोके अन्याय विरुद्धमे आन्दोलित हुइल उहाँके कहाइ बा ।
विश्वविद्यालयके रजिष्ट्रार यज्ञराज पाठक सिनेटके बैठकमे सहभागी होके निर्णय सदरमे सहिछाप करल व्यक्ति नै आन्दोलनमे उत्रना लज्जास्पद हुइल बटैलै । ‘कुहीहे गुमराहमे राखके निर्णय नैहो,’ उहाँ कहलै, ‘निर्णयमे सबके सहभागिता रहे ।’
सिनेट हुइनासे आघे सक्कु एजेण्डामे प्राध्यापक संघके सभापति उत्तम थापासहितके सहभागितामे छलफल होके नै निर्णय पारित हुइल उहाँके कहाइ बा । इहीसे आघे विश्वविद्यालयमे विद्यार्थी संघ संगठनसे टमान माग आघे सर्टी तालाबन्दी कैके आन्दोलनमे उत्रल रहिट ।
माओवादी केन्द्र निकट अखिल क्रान्तिकारी, एमाले–समाजवादी निकट अनेरास्ववियू तीनु विद्यार्थी संघ संगठनसे छुट्टाछुट्टे रुपमे विश्वविद्यालयमे तालाबन्दी कैके आन्दोलनमे उत्रल बाटै ।
क्रान्तिकारीसे सुप विश्वविद्यालय केन्द्रीय क्याम्पस, समाजवादी निकट अनेरास्ववियूसे उपकुलपति डा अमराज जोशी ओ एमाले निकट अनेरास्ववियुसे केन्द्रीय कार्यालयके मुल गेटमे तालाबन्दी करले बाटै ।
