बझाङ बाहेकके जिल्लामे एमालेके अधिवेशन
पहुरा समाचारदाता
धनगढी, २३ पुस । नेपाल कम्युनिट पार्टी (एमाले) सुदूरपश्चिम प्रदेशके बझाङ बाहेक प्रदेशके ८ जिल्लामे नेतृत्व चयनके लाग अधिवेशन सुरु हुइल बा । बझाङमे प्रतिकुल मौसमके कारण हुइ नैसेकल जनाइल बा ।
अधिकांश जिल्लामे अध्यक्षके लाग एक से ढेर बा । सहमतीके प्रयास हुइटिरहल बा कलेसे सहमती हुइ नैसेकल निर्वाचनमार्फत नेतृत्व चयन करना एमाले जनैले बा ।
प्रदेशके सबसे चासके रुपमे हेरल जिल्ला कैलालीमे नेतृत्वके तीन जाने आकांक्षी बटैं । जिल्लामे रणबहादुर चन्द, रतन थापा ओ डेजी पाण्डे आकांक्षी बटैं । एमालेके आघेक अधिवेशनमे उपाध्यक्षमे निर्वाचित थापा अब्बे जिल्ला अध्यक्ष ओ सचिवमे निर्वाचित चन्द उपाध्यक्षके पद सम्हरले बटैं ।
कैलालीमे सहमती हुइना सम्भावना कम रहल नेताहुक्रे बटैले बटैं । ‘सहमतीके सम्भावना एकदम न्यून रहल बा,’ एक नेता कलैं । नेता भीम रावल पक्षधर नेता कार्यकर्ताहुक्रे निर्वाचन हुइपरना जोर डेले बटैं कलेसे भिमरावल इतरपक्ष सहमतीमे टुंगाइ पर्ना करले बटैं ।
कञ्चनपुरके नेतृत्व छनोटके लाग फेन तीन जाने दाबेदारी पेश करले बटैं । जिल्लामे एमालेके वर्तमान अध्यक्ष वीरबहादुर थापा, भीमदत्त नगरपालिकाके मेयर सुरेन्द्र बिष्ट ओ वेदकोट नगरपालिकाके मेयर अशोक चन्द अध्यक्षमे आकांक्षी बटैं ।
डडेल्धुरामे अध्यक्षके लाग वर्तमान अध्यक्ष प्रकाश साउँद, अमरगढी नगरपालिकाके मेयर विशेश्वर प्रसाद ओझा, राष्ट्रिय युवा संघके केन्द्रीय उपाध्यक्ष गजेन्द्र शाही ओ प्रदेश कमिटी सदस्य पदम पाल आकांक्ष बटैं । बैतडीमे वर्तमान अध्यक्ष सुरेन्द्र पाल ओ पञ्चेश्वर गाउँपालिकाके अध्यक्ष गोरखबहादुर चन्द अध्यक्ष पदमे आकांक्षी बटैं ।
पार्टी सहमति करलमे दार्चुलामे वर्तमान अध्यक्ष रामचन्द्र जोशी पुनः अध्यक्ष बन्ना दाउमे बटैं । मने उहाँसंग नौगाढ गाउँपालिकाके अध्यक्ष प्रेमसिंह धामी, एमाले प्रदेश कमिटी सदस्य मोहनसिंह धामी, वर्तमान उपाध्यक्ष उदयसिंह बडाल ओ ज्ञानेन्द्र घर्तीसे फेन अध्यक्ष बन्ना चाहना बनैले बटैं । बाजुरामे कालीबहादुर शाही, भरत थापा, भरत बुढा ओ लालबहादुर ओली अध्यक्षके आकांक्षी बटैं । बाजुरामे नेकपा एमाले केन्द्रीय सदस्य तथा स्थायी कमिटी सदस्य कर्णबहादुर थापा ओ केन्द्रीय सदस्य लालबहादुर थापाके फरक–फरक धारमे हुइना चर्चा बा ।
स्थायी कमिटी सदस्य कर्णबहादुर थापाके टिमसे लालबहादुर ओली अध्यक्षके उम्मेदवार रहना ओ केन्द्रीय सदस्य लालबहादुर थापाके टिमसे कालीबहादुर उम्मेदवारी रहेना चर्चा बा ।
युवापिढी चुनाव हुइपरनामे जोड डेलेबा कलेसे केन्द्रीय स्तरके नेताहुकनके सहमती कैके अधिवेशन सम्पन्न पर्ना गृहकार्यमे जुटल बटैं । चुनाव हुइलेसे अन्तरविरोध हुइना हुइल ओरसे सहमतीमे टुंगैना कोसिसमे लग्ना एमाले बाजुराके एक नेता बटैले बटैं । अछाममे प्रकाश शाह, चन्द्र बोहरा ओ कृष्णप्रसाद जैशी फेन अध्यक्षके आकांक्षी बटैं ।
