बाघके छालासहित ४ जाने पक्राउ

पहुरा समाचारदाता
दाङ, २४ पुस । दाङमे प्रहरी बाघके छालासहित चार जनहनहे पक्राउ करले बा ।

पक्राउ परुइयामे घोराही उपमहानगरपालिका–१३ के शंकर गिरी, उहाँक गोसिनीय झरना थापा, लमही नगरपालिका– १ नर्तिके गिरबहादुर विश्वकर्मा ओ लमही नगरपालिका –२ बरुवा गाउँके आशाकुमार चौधरी रहल बटै ।

प्रहरीसे गोप्य सूचनाके आधारमे लमही नगरपालिका– ३ टिकुलीगढसे बाघके छालासहित चार जनहनहे नियन्त्रणमे लेहल वडा प्रहरी कार्यालय लमहीके प्रहरी निरीक्षक राजन पौडेल जानकारी डेलै ।

बाघके छाला बिक्री करे लागल अवस्थामे पक्राउ करल प्रहरी निरीक्षक पौडेल बटैलै । बरामद करल बाघके छालासहित ओइनहे डिभिजन वन कार्यालय देउखुरी दाङहे बुझैना उहाँ बटैलै ।