कैलारीसे भूमिहीनहे लालपूर्जा वितरणके लाग सम्झौता

पहुरा समाचारदाता
धनगढी, २४ पुस । भूमिहीन, दलित, सुकुम्बासी ओ अव्यवस्थित बसोबासीके जग्गा नाप जाँच ओ लालपूर्जा वितरणके लाग राष्ट्रिय भूमि आयोग ओ स्थानीय तहबीच सम्झौता हुइल बा ।

काठमाण्डौंमे एक कार्यक्रमके बीच आयोग ओ स्थानीय तहबीच दुई पक्षीय सम्झौता हुइल हो । इहे क्रममे कैलालीके कैलारी गाउँपालिकासे फेन भूमिहीन, सुकुम्बासी ओ अव्यवस्थित बसोबासीहे जग्गा नाप, जाँच ओ लालपूर्जा वितरणके लाग सम्झौता करले बा । भूमि व्यवस्था, सहकारी तथा गरिबी निवारणमन्त्री शशि श्रेष्ठके उपस्थितिमे आयोगके पदाधिकारी ओ कैलारी गाउँपालिकाके अध्यक्ष लाजुराम चौधरी सम्झौतापत्रमे सम्झौता करल रहिट ।

इहीसे आघे, तत्कालीन भूमि सम्बन्धी समस्या समाधान आयोग रहल बेला भूमिहीन, सुकुम्बासी, अव्यवस्थित बसोबासीके विवरण संकलन कैनाके साथे राजस्व उठाइल रहे । आयोगमार्फत गैल बरस भूमिहीन, सुकुम्बासी ओ अव्यवस्थित बसोबासीके तथ्याङ्कसमेत संकलन हुइल रहे ।

मने, केपी ओली नेतृत्वके सरकार हटलपाछे गठित देउवा नेतृत्वके सरकारसे भूमि सम्बन्धी समस्या समाधान आयोग खारेज कैके राष्ट्रिय भूमि आयोग गठन करल रहे । आब भूमिहीन, सुकुम्बासी ओ अव्यवस्थित बसोबासीके व्यवस्थापन ओ लालपूर्जा वितरण राष्ट्रिय भूमि आयोगसे कैना जनाइल बा ।