सक्रिय सक्रमित ३०४ पुग्लै, १३३ संक्रमित ठप्लै
पहुरा समाचारदाता
धनगढी, २५ पुस । सुदूरपश्चिम प्रदेशमे शनिच्चरसम कोरोनाके सक्रिय सक्रमित संख्या ३०४ पुगल बा ।
भारतमे ओमिक्रोन विरामी बह्रलसंग्गे यहाँफे एक अठुवारसे निरन्तर कोरोना संक्रमणदर उच्च डेखल सुदूरपश्चिम प्रदेश सामाजिक विकास मन्त्रालय स्वास्थ्य निर्देशनालय जनैले बा ।
भारतके टमान प्रान्तमे ओमिक्रोनके विमारी एकफाले बह्रलपाछे रोजगारके लाग गैल हजारौं नेपाली वहाँसे स्वदेश लौटन क्रम बह्रलसंग्गे यहाँफे कोरोना संक्रमणदरमे वृद्धि हुइल मन्त्रालय जनैले बा ।
पछिल्का २४ घण्टामे एन्टीजेन ओ आरटी पीसिआर विधिसे परिक्षण करेबेर १३३ जाने कोरोनाके लौवा संक्रमित ठपल मन्त्रालय जनैले बा । १३ सय ४४ जानेक एन्टीजेन करेबेर १२५ ओ ३६ जानेक आरटी पीसिआर विधिसे परिक्षण करेबेर ८ जाने लौवा संक्रमित ठपल हुइल हुइट । ओस्टेक यिहे अवधिमे ६ जाने केल ठिक हुइल बटै । सक्रिय संक्रमित सबसे ढेर कञ्चनपुर जिल्लामे १५८ जाने ओकरपाछे कैलालीमे १२० जाने रहल बटै ।
शनिच्चरके रोज केल सुदूरपश्चिम प्रदेशके टमान नाकासे १७ सय ३२ जाने स्वदेश लौटल बटै । जेम्ने गौरीफन्टा नाकासे ९८०, गडडाचौकीसे ७१७, झुलाघाट नाकासे ३५ जाने स्वदेश लौटल मन्त्रालयके तथ्याङकमे डेखा परल बा ।
छिमेकी राष्ट्र भारतमे कोरोना भाइरसके ओमिक्रोन भेरियन्ट तीव्र रूपमे पैmलेबेर भारतसे नेपाल लौटुइयाके संख्या बह्रे लागल बा । भारतमे कोरोना संक्रमण दर बढलपाछे भारतसे अउइया नेपालीहुकनके संख्या बढल गौरीफण्टा नाकास्थित स्वास्थ्य परीक्षण डेस्कके इन्चार्ज गणेश साउँद बटैलै ।
भारतसे लौटना नेपालीके सीमा क्षेत्रमे कोरोना परीक्षण हुइटी रहल ओ स्वास्थ्य सामाग्री पर्याप्त रहल उहाँ बटैठै । अब्बे खोप नइलगाइल व्यक्तिहे सीमामे खोप समेत प्रदान करटी आइल बा ।
स्वास्थ्य संयोजक साउँदके अनुसार भारतसे लौटुइया नेपालीमे कोरोना संक्रमण विल्गैना दरफे उच्च हुई लागल बा । उहाँक अनुसार भारतसे अइना नेपाली मध्ये पुस २२ गते ४८ जनहनमे, पुस २३ गते ६७ जनहनमे ओ शनिच्चर ७१ जनहनमे कोरोना संक्रमण पुष्टि हुइल बा ।
