वागेश्वरीके अध्यक्षमे फेनसे मल्ल

पहुरा समाचारदाता
हसुलिया, २५ पुस । कैलारी गाउँपालिका वडा नम्बर–१, हसुलिया बजारस्थित वागेश्वरी कृषि तथा लघु उद्यम सहकारी संस्थाके दशौं वार्षिक साधारण सभा फेनसे श्याम मल्लके अध्यक्षतामे ७ सदस्यीय लावा कार्यसमिति चयन करले बा ।

शनिच्चरके रोज हुइल साधारण सभासे कार्यसमितिके उपाध्यक्षमे जीतबहादुर रावत, सचिवमे प्रभुराम चौधरी कोषाध्यक्षमे सन्तराम चौधरी, चयन हुइल बटैं । ओस्टेक, सदस्यमे मदनप्रसाद पौडेल, रुकमणि पौडेल, विनोद चौधरी चयन हुइल बटैं ।

सहकारीके ऋण समितिके संयोजकमे चुल्लुराम चौधरी चयन हुइल बटैं । ऋण समितिके सदस्यमे हरिराम चौधरी, नविलाल चौधरी, वीरेन्द्रप्रसाद चौधरी, रामेश्वर चौधरी चयन हुइल बटैं ।

ओस्टेक, गगन महतोके संयोजकत्वमे लेखा समिति चयन हुइल बा । लेखा समितिके सदस्यमे नरेश चौधरी, हनुमान चौधरी, मायाकुमारी चौधरी, ललिता चौधरी चयन हुइल बटैं ।

यिहीआघे कैलारी सहकारी समन्वय समितिके अध्यक्ष बतासु चौधरी कार्यक्रममे उद्घाटन करले रहिट । यहाँके उपभोक्ता कृषि क्षेत्रमे निर्भर हुइल ओरसे कृषि क्षेत्रमे ढेर जोड देहल समन्वय समितिके अध्यक्ष बटैलैं । सहकारीसे कृषि क्षेत्रमे फेन विकास हुइटी रहल जानकारी डेलै । सहकारीसे यहाँके किसानहुकन रोजगारीके अवसर पैैटी रहल उहाँ बटैलैं ।

आर्थिक वर्ष २०७८ असार मसान्तसमके पाँच करोड १० लाख ५७ हजार सात सय १६ रुप्या बराबरके कारोबार हुइल सहकारी संस्थाके कोषाध्यक्ष सन्तराम चौधरी जानकारी डेलै । ओ २८ लाख ९० हजार पाँच सय ४८ बराबरके खुद नाफा हुइल बटैलै ।

आर्थिक बरस २०७७/०७८ सालके कुल आम्दानी ६१ लाख ५० हजार छ सय ९१ बराबरके आम्दानी हुइल बटैलै । आर्थिक बरस २०७८/०८९ सालके अनुमानित आय व्यय १३ करोड ७२ लाख बराबरके आय व्यय प्रस्तुत करले रहिट ।

उहे अवसरमे असल वचत कर्ता मनोज चौधरी, अशोककुमार चौधरी, बुधराम चौधरी, ज्ञानु चौधरी, मीरादेवी चौधरी, द्रवित चौधरीहे सम्मान करगील बा कलेसे असल ऋणीमे हरिराम चौधरी, विराजु चौधरी, रमेशकुमार मल्ल, धनबहादुर चौधरी, भागीराम कठरियाहे दोसल्ला ओ प्रमाणपत्रसहित सम्मान करगील बा ।

संस्थाके वार्षिक साधारण सभामे सेयर सदस्य गौरीशंकर महतो, कैलारी उद्योग बाणिज्य संघके अध्यक्ष नेपालु चौधरी मन्तव्य व्यक्त करले रहिट कलेसे संस्थाके उपाध्यक्ष जीतबहादुर रावत संस्थाके बारेमे जानकारी डेले रहिट ।

कार्यक्रम संस्थाके अध्यक्ष श्याम मल्लके अध्यक्षतामे हुइल रहे कलेसे कार्यक्रम सञ्चालन संस्थाके सञ्चालक समिति तथा संस्थापक सदस्य मदन पौडेल करले रहिट ।

संस्थाके संस्थापक सदस्य चुल्लुराम चौधरी स्वागत मन्तव्य व्यक्त करले रहिट कलेसे कार्यक्रममे शेयर सदस्य लगायत समाजसेवी, बुद्धिजीवीहुकनके उपस्थिति रहल रहे । वागेश्वरी कृषि तथा लघु उद्यम सहकारीमे चार सय ७१ शेयर सदस्य रहल बाटै ।