माघ १५ गतेसम विद्यालय बन्द कैना सिफारिस
काठमाडौं, २५ पुस । कोभिड १९ व्यवस्थापन समितिके बैठकसे अइना माघ १५ गतेसम कक्षा १० समके विद्यालय बन्द कैना सिफारिस करले बा ।
अँटवार बैठल बैठकसे कोरोना संक्रमणके जोखिमहे मध्यनजर करटी माघ १५ गतेसम विद्यालय बन्द कैना सिफारिस करल कोभिड–१९ संकट व्यवस्थापन समन्वय केन्द्रके प्रवक्ता सहसचिव सुनिता नेपाल जानकारी डेली ।
कोरोना संक्रमण पछिल्का दिनमे बह्रटी गैल निष्कर्षके साथ बैठकसे यी निर्णय करल उहाँक कहाई बा । बैठकसे करल निर्णय कार्यान्वयनके लाग संघीय मामिला तथा सामान्य प्रशासन मन्त्रालयहे लिखके पठैना निर्णय बैठकसे करले बा ।
ओस्टेक अइना माघ ३ गतेसे सार्वजनिक स्थलमे प्रवेश करेबेर कोरोना भ्याक्सिन लगाइल कार्ड डेखाई पर्ना हुइल बा ।
टमान सार्वजनिक स्थलमे प्रवेश करेबेर कार्यालय, होटेल, सिनेमा हल, रंगशाला, हवाइ यात्रा करेबेर भ्याक्सिन लगाइल प्रमाण डेखाके केल सेवा लेहे पैना करके निर्णय हुइल बा । उहाँ कहली, यी माघ ३ गतेसे लागू हुई भ्याक्सिन लगाइल कार्ड मोबाइलमे खिचके मोबाइलसे डेखैलेसेफे हुई ।
