एमाले कैलाली नेतृत्वके लाग मतदान सुरु
पहुरा समाचारदाता
धनगढी, २६ पुस । एमाले कैलालीके नेतृत्वके लाग मतदान सुरु हुइल बा । सोम्मबार बिहानसे मतदान सुरु हुइल हो । अध्यक्षलगायत पदाधिकारीमे सहमती नैहुइलपाछे निर्वाचन हुइल हो ।
धनगढीस्थित ऋद्धिसिद्धी पार्टी प्यालेसमे मतदान शुरु हुइल निर्वाचन समिति जनैले बा । मतदान दिनके ४ बजेसम हुइना जनागिल बा ।
अध्यक्षमे वर्तमान अध्यक्ष रतन थापा ओ उपाध्यक्ष रणबहादुर चन्द प्यानलसहितके उम्मेदवारी बा । उपाध्यक्षमे दुर्गा जोशी ओ सीताराम बुढाथोकीके उम्मेदवारी परल बा ।
सचिवमे दानबहादुर बिक ओ डेजी पाण्डेके उम्मेदवारी बा । उपसचिवमे मदन ओझा, प्रेम चौधरी, ममता चौधरी, लोकेन्द्र साही ओ विनय शाहके उम्मेदवारी परल बा । सदस्यके कुछ क्षेत्रमे भर अँट्वारके रोजे निर्विरोध होसेकल बा । कैलालीमे ६०६ जाने प्रतिनिधि मतदान करहि ।
यीआघे अँट्वार बिहान ८ बजेके लाग तोकल मतदान निर्वाचन समिति प्राविधिक कारण डेखैटि दिनके सरले रहे । मने, साँझसम मतदान प्रक्रिया शुुरु हुइ नैसेकल रहे ।
मतदानमे ढिलाइ हुइल कटि प्रतिनिधि आक्रोशित हुइलओरसे महाधिवेशन स्थलमे तनाव सिर्जना हुइल रहे । दुई पक्षबीचके विवादके कारण निर्वाचन समिति सोम्मारसमके लाग निर्वाचन प्रक्रिया स्थगित करले रहे ।
