भारतमे अक्के दिनमे १ लाख ८० हजार कोरोना संक्रमित
काठमाडौं, २६ पुस । छिमेकी मुलुक भारतमे दैनिक कोरोना संक्रमितके संख्या एक लाख ८० हजार लग्गे पुगल बा ।
भारतके केन्द्रीय स्वास्थ्य मन्त्रालयके अनुसार सोम्मारके कोभिड–१९ के एक लाख ७९ हजार ७२३ लावा संक्रमित थपल बाटै । पाछेक २४ घण्टामे १४६ जाने संक्रमितके मृत्यु हुइल मन्त्रालय जनैले बा ।
सोम्मारके थपल संक्रमितसँगे हाल भारतमे सक्रिय संक्रमितके संख्या ७ लाख २३ हजार ६१९ पुगल बा । ओस्टके, दैनिक संक्रमण दर (पोजिटिभिटी रेट) १३.२९ प्रतिशत रहल भारतीय समाचार माध्यम जनैले बा ।
भारतमे कोभिड–१९ के लावा ओमिक्रोन भेरियन्टके संक्रमित समेत बह्रटी रहल बावै । वहाँ हालसम ४ हजार ३३ जनहनमे इ भेरियन्टके संक्रमण पुष्टि हुइल बा । ओमिक्रोनके संक्रमितमध्ये महाराष्ट्रमे सबसे ढिउर रहल बाटै ।
केन्द्रीय मन्त्रालयके अनुसार महाराष्ट्रमे सोम्मारसम ओमिक्रोनसे संक्रमित हुउइयाके संख्या १ हजार २१६ पुगल बा । डुसर स्थानमे रहल राजस्थानमे ओमिक्रोनके संक्रमितके संख्या ५२९ पुगल बा । ओस्टके, हालसम दिल्लीमे ५१३ ओ कर्नाटकमे ४४१ जाने इ भेरियन्टसे संक्रमित हुइल बाटै ।
