थारू पत्रकार संघके केन्द्रीय महाधिवेशन चैतके दोसर साता

पहुरा समाचारदाता
काठमाडौं, २६ पुस । थारू पत्रकार संघ नेपाल पाँचौं केन्द्रीय महाधिवेशन आगामी चैत १२ ओ १३ गते नवलपुरमे करना निर्णय करले बा । कपिलवस्तुके बाणगंगा–४, जितपुरमे अँट्वार आयोजित केन्द्रीय कमिटीके नवौं बैठकसे उ निर्णय करल हो ।

ओस्टेक, बैठकसे आदिवासी जनजाति पत्रकार महासंघके केन्द्रीय महाधिवेशनके लाग तीन जहनहे प्रतिनिधि पठैना हुइल बा, जेम्ने प्रदीप लेखी, मदन चौधरी ओ पार्वता चौधरी रहल बटैं ।

बैठक संघके विधान संशोधन मस्यौदा तयार करले बा । मस्यौदा विधानसे संघके केन्द्रीय, प्रदेश ओ जिल्ला कमिटी रहना व्यवस्था करल बा । ओस्टेक, विधान मस्यौदामे संघके कार्य समितिके कार्यकाल ३ वर्षके हुइना प्रस्ताव करल बा । यीआघे २ वर्षके कार्यकालके व्यवस्था रहे ।

संघके केन्द्रीय अध्यक्ष सन्तोष दहितके अनुसार केन्द्रीय कमिटी बैठक आगामी माघ १५ गतेभित्तर जिल्ला शाखाके अधिवेशन, फागुन ७ भित्र संघके प्रदेश कमिटी गठन करना निर्णय करल बा । संघके १६ जिल्लामे शाखा रहल बा कलेसे यम्ने नेपाल भरिक करिब पाँच सय थारू पत्रकार आबद्ध रहल बटैं ।