एमाले कैलाली अधिवेशनके मतदान ओराइल, मतगणना आजुसे

पहुरा समाचारदाता
धनगढी,२६ पुस । नेकपा एमाले कैलालीके नयाँ नेतृत्वके लाग सोम्मारके रोज मतदान हुइल बा ।

सकारे ९ बजेसे सुरु हुइल मतदानमे ५८९ मत परल बा । छ सय ९ प्रतिनिधिमे मत परल हो । मतगणना सोम्मार रातसे हुइना निर्वाचन टोली जनैले बा । अध्यक्ष सहित १५० पदके लाग ३ सय २९ जाने चुनावी मैदानीमे उटरल बटै । अध्यक्ष पदके लाग वर्तमान अध्यक्ष रतन थापा ओ उपाध्यक्ष रणबहादुर चन्दके उम्मेदवारी परल रहे ।

जिल्ला अध्यक्षमे विगतसे एमाले पृष्ठभुमी रहल दुई नेतावीच प्रतिस्पर्धा हुइटी रहलेसेफे चुनावमे पूर्व माओवादीविरुद्ध एमाले एक ठाउँमे डेखल बा । माओवादी छोरके एमाले रोजल केन्द्रीय सचिव तथा सुदूरपश्चिम इञ्चार्ज लेखराज भट्ट अध्यक्षमे थापाहे सहयोग करले बटै । उहाँक प्यानलसे सचिवमे पूर्वमाओवादीके दानबहादुर बिक चुनावी मैदानमे बटै । भट्ट अपन स्वकीय सचिव हितेश ओझाहेफे थापा प्यानलसे चुनाव लरैले बटै । भट्टसंगे एमाले सुदूरपश्चिमके सहइञ्चार्ज कर्ण थापाफे थापा प्यानलहे सहयोग करले बटै ।

केन्द्रीय सचिव भट्ट पक्षधरके रतन थापाविरुद्ध एमालेके नारदमुनी राना, झपट रावल, लिला भण्डारी, कमला वली, दीपक देवकोटा लगायतके नेता मोर्चावन्दी करले बटै । ओइने चन्द प्यानलहे साथ डेले बटै । उ प्यानलहे एमालेके पूर्व उपाध्यक्ष भीम रावलकेफे साथ बा । उपाध्यक्षमे दुर्गा जोशी ओ सिताराम बुढाथोकीके उम्मेदवारी परल बा । सचिवमे दानबहादुर विक ओ डेजि पाण्डेके उम्मेदवारी बा । ओस्टेक उपसचिवमे मदन ओझा, प्रेम चौधरी, ममता चौधरी, लोकेन्द्र साही ओ विनय शाहके उम्मेदवारी परल बा । १२ पदके खुल्ला पुरुषमे ५७ जानेक उम्मेदवारी बा । खुल्लाओर १२ महिना निर्विरोध निर्वाचित हुइल बटै । भूगोलओर १ से २५, जाने २ से ३१ जाने, ३ से २० जाने, ४ से ३० ओ ५ से ३० जानेक मनोनयन दर्ता हुइल बा । ५ निर्वाचन क्षेत्रसे भूगोल महिला ५÷५ जानेक दरसे २५ जाने निर्विरोध निर्वाचित हुइल बटै । जनजातिओर ३ पदमे ११ जानेक उम्मेदवारी बा । महिलाओर २ जाने निर्वाचित हुसेकल बटै । दलितओर ८ पदमे १७ जानेक उम्मेदवारी बा । राना थारुओर ८ जानेक पदमे १५ जानेक उम्मेदवारी छ । राना थारु ओर ५ महिला निर्विरोध निर्वाचन हुइल बटै ।

पेसागत खुल्ला ओर १ पदमे २ जानेक उम्मेदवार बा । १ पदमे महिला निर्विरोध हुइल बटै । मजदुरओर पुरुष ओ महिला करके ३ जाने निर्वाचित हुइल बटै । दलितओर ८ जानेक मे १७ जानेक उम्मेदवारी बा कलेसे महिलाओर ४ जानेक पदमे ९ जानेक उम्मेदवारी बा । अपाङताओर १ पदमे ३ जानेक उम्मेदवारी बा । अल्पसंख्यकमेफे १ जाने पदमे ३ जानेक उम्मेदवारी बा ।