२ हजार ४ सय ४४ जनहनमे कोरोना पुष्टि

काठमाडौं, २७ पुस । पाछेक २४ घण्टामे दुई हजार चार सय ४४ जनहनमे कोरोना भाइरसके संक्रमण पुष्टि हुइल बा । पीसीआर ओ एन्टिजेन कैके १५ हजार ३३ जनहनके नमुना परीक्षण करेबर १६ दशमलव २५ प्रतिशत अर्थात् दुई हजार चार सय ४४ जनहनमे संक्रमण पुष्टि हुइल स्वास्थ्य तथा जनसंख्या मन्त्रालय जनैले बा ।

ओस्टके पाछेक २४ घण्टामे तीन सय १३ जाने चोखाइल बाटै । इ सहित कोरोना संक्रमणमुक्त हुउइयाके संख्या आठ लाख १४ हजार सात सय ९८ पुगल बा ।

इहे अवधिमे एक जाने सहित कोरोना सङ्क्रमणके कारण ज्यान गुमुइयाके संख्या ११ हजार ६ सय सात पुगल बा ।

ओस्टके अब्बे नेपालमे नौ हजार पाँच सय २२ जाने कोरोना भाइरसके सक्रिय सङ्क्रमित रहल मन्त्रालय जनैले बा ।

ओहे बीच पाछेक २४ घण्टामे एक लाख ८० हजार चार सय ५७ जाने कोरोनाविरुद्धके खोप लगैले बाटै ।