एमाले कैलालीके अध्यक्षमे थापा विजयी
पहुरा समाचारदाता
धनगढी, २७ पुस । नेकपा एमाले कैलालीके अध्यक्षमे रतन थापा विजयी हुइल बटैं । अध्यक्षके औरे प्रत्यासी रणबहादुर चन्दहे ४ मतसे पराजित करटि थापा आठौं अधिवेशनसे जिल्ला अध्यक्षमे निर्वाचित हुइल हुइटन् ।
सोम्मार रात सार्वजनिक हुइल मतपरिणाम अनुसार थापा २८७ मत पैलैं कलेसे चन्द २८३ मत पैmलैं ।
ओस्टेक, उपाध्यक्षमे सीताराम बुढाथोकीहे पराजित करटि दुर्गाप्रसाद जोशी विजयी हुइल बटैं । जोशी ३२७ मत पैलैं कलेसे बुढाथोकी २०९ मत पैलैं । सचिवमे डेजी पाण्डे २९४ मत नान्के विजयी हुइल बटैं । पाण्डे चन्द प्यानलसे लरल रहैं । उहाँक प्रतिद्वन्द्वी दानबहादुर विक २६० मत पैलैं । ओस्टेक, उपसचिवमे ममता चौधरी ओ लोकेन्दबहादुर शाही विजयी हुइल बटैं ।
सचिव तथा सुदूरपश्चिम इञ्चार्ज लेखराज भट्ट अध्यक्षमे थापाहे सहयोग करले रहैं । भट्टसँगे एमाले सुदूरपश्चिमके सहइञ्चार्ज कर्ण थापा फेन थापा प्यानलहे सहयोग करले रहैं ।
चन्दहे नारदमुनी राना, झपट रावल, लिला भण्डारी, कमला वली, दीपक देवकोटा लगायतके नेता सहयोग करले रहैं ।
