जोशीपुरमे माघी मिलन कार्यक्रम
पहुरा समाचारदाता
जोशीपुर, २८ पुस । कैलालीके जोशीपुरमे थारु सांस्कृतिक झाँकी सहित माघी मिलन तथा शुभकामना आदानप्रदान कार्यक्रम कैगिल बा ।
जोशीपुर गाउँपालिकाके आयोजना तथा पूर्व स्वास्थ्य मन्त्री माननीय रामजनम चौधरीके वडका पहुनामे कार्यक्रममे उहाँ स्थानीय सरकार जोशीपुर गाउँपालिका ५ वर्षमे उदाहरणीय विकासके काम करल बटैलै । यहाँके डगरघाट, भौतिक संरचना, शिक्षा, स्वास्थ्य, कृषि क्षेत्रमे स्थानीय सरकारसे करल विकास प्रशंसानिय रहल उहाँ बटैलै । कैलालीके सक्कु स्थानिय तहसे कम बजेट रहल स्थानीय तह जोशीपुर गाउँपालिकासे विकासके क्षेत्रमे आघे रहल पूर्व स्वास्थ्य चौधरी बटैलै ।
कार्यक्रमके विशिष्ट पहुना संविधान सदस्य बुद्धिसागर चौधरी संविधानमे विविध समुदायके पहिचान झल्कना साँस्कृति नाच संरक्षण करे पैना अधिकार सुनिश्चित करल बटैलै । अब्बे गाउँगाउँमे रहल सिंहदरवारसे अपन पौराणिक, परम्परागत, संस्कृति झल्कना नाच संरक्षण तथा प्रवद्र्धन कैना अवसर प्राप्त हुइल उहाँ बटैलै ।
जोशीपुर गाउँपालिका अध्यक्ष रामकृष्ण चौधरीके अध्यक्षतामे हुइल कार्यक्रममे गाउँपालिका उपाध्यक्ष गिता कठरिया स्वागत मन्तव्य व्यक्त करले रहिट । कार्यक्रममे टमान पार्टी प्रतिनिधि, समाजसेवी, बुद्धिजीवी, शिक्षाप्रेमी माघे संक्रान्ती तथा थारु जातीके नयाँ वर्ष माघीके अवसरमे शुभकामना व्यक्त करले रहिट ।
कार्यक्रममे थारु महालोक गायक मनिराम करियामघरियाके प्रस्तुति लगायत मंग्रहुवा नाच, कठरिया होली नाच, डेउरा, धमार गीत फेन प्रस्तुत करल रहे । औपचरिक कार्यक्रमहे थमराज जोशी ओ संस्कृति कार्यक्रमहे गायक खुशी रत्गैंया सहजीकरण करले रहिट ।
