घोडाघोडी नगरपालिकाहे साक्षर घोषणा

पहुरा समाचारदाता
सुखड, २९ पुस । कैलालीके घोडाघोडी नगरपालिकाहे ‘साक्षर नगरपालिका’ घोषणा करल बा ।

नगरपालिकाके सक्कु १२ वडाके ६० बरससे कम उमेरके ९८ प्रतिशत नागरिक साक्षर हुइलपाछे बिफेक रोज नगरपालिकाहे साक्षर नगर घोषणा करल हो । एक समारोहके बीच सुदूरपश्चिम प्रदेशके सांसद अमर बहादुर साउँद नगरपालिकाहे साक्षर नगरपालिका घोषणा करल हुइट ।

नेपाल सरकारके साक्षर नेपाल घोषण नीति बमोजिम घोडाघोडी नगरपालिकाहे साक्षर नगरपालिका घोषण करल बटाइल बा । भव्य कार्यक्रम कैके नगरहे ‘साक्षर नगरपालिका’ घोषणा कैना कार्यक्रम रलेसे फेन कोरोनाके कारणसे करे नैसेकल शिक्षा शाखा प्रमुख उमेश राज रेग्मी जानकारी डेलै ।

शिक्षा विकास तथा समन्वय इकाई कैलाली फेन चालु आर्थिक बरसमे जिल्लाहे पूर्ण साक्षर घोषणा करैना मेरके तीव्र रूपमे काम आघे बह्राइल जनाइल बा ।

सरकारसे साक्षर घोषणाके लाग १२ सूचक आधार बनैले बा । सूचकमे राष्ट्रभाषा वा मातृभाषाके वर्णके अक्षरके पह्राइ ओ लिखाइ करे सेक्ना, राष्ट्रभाषा वा मातृभाषामे लिखल मुल्यसूची ओ बिलके पह्राइ, आपन परिवारके नाउँ, उमेर लेखाइ ओ पह्राइ, मोबाइल ओ क्यालकुलेटरके अकं ओ अक्षर चिन्हके प्रयोग करे जन्ना, शून्यसे नौ समके अकं अक्षर लिखाइ १ से १ सयसमके गणना, लेनदेन करल हरहिसाब रख्ना लगायतके सूचक रहल बावै । कार्यक्रममे उपस्थित सहभागीहुक्रे आब १४ वर्षे योजना बनाके नगरपालिकाके सक्कु सामुदायिक तथा निजि विद्यालयके भौतिक पूर्वाधारके विकास तथा गुणस्तरीय शिक्षा लगायत माग राखल रहिट ।

घोडाघोडी नगरपालिकाके नगर प्रमुखके ममताप्रसाद चौधरीके अध्यक्षतामे हुइल कार्यक्रममे जिल्ला समन्वय समितिके सभापति सूर्यबहादुर थापा, उपप्रमुख प्रेमकुमारी थापा, प्रशासकीय अधिकृत खगेन्द्रबहादुर सिंह, सामुदायिक सिकाई केन्द्रके संयोजक शिव प्रसाद ढकाल, टमान सरोकारवाला, शिक्षक, विद्यार्थी लगायतके सहभागिता रहल रहे ।