भारतसे अउइया व्यक्तिनसे समुदायमे संक्रमणके जोखिम
पहुरा समाचारदाता
धनगढी, २९ पुस । टमान नाका होके भारतसे अइटी रहल व्यक्तिनसे सुदूरपश्चिम प्रदेशमे कोरोना संक्रमण समुदायस्तरमे संक्रमण उच्च हुइना खतरा बह्रल बा । प्रदेशके चारठो नाकासे दैनिक अइटी रहल मध्ये कैयौं व्यक्ति परीक्षण नैकराके घरओर जैटी रहल ओरसे सङ्क्रमण समुदायमे फैलना खतरा बह्रल हो ।
पाछेक समय भारतमे सङ्क्रमण अत्यधिक बह्रल ओरसे भारतसे अउइया नेपालीनमे सीमा नाकामे कोरोना सङ्क्रमण ढिउर पुष्टि हुइटी रहल ाब । भारतके टमान राज्यमे लावा भेरियन्ट ओमिक्रोनसहितके कोरोना सङ्क्रमण बह्रलपाछे कामके सिलसिलामे भारत पुगल नेपाली धमाधम अइटी रहल बाटै । प्रदेशके गौरीफन्टा, गड्डाचौकी, झुलाघाट, पुलघाट नाका होके अइटी रहल उहाँहुक्रनके नाकामे कोरोना परीक्षणके व्यवस्था करल बा ।
एन्टिजेन विधिसे नाकामे परीक्षण कैना व्यवस्था हुइलेसे फेन सङ्क्रमण बह्रल ओरसे स्वदेश अइटी रहल कैयौं व्यक्तिः परीक्षण नैकराके घर जैटी रहल बाटै । ओइसीन व्यक्तिके लापरवाहीके कारण लावा भेरियन्टसमेत समुदायमे फैलना खतरा रहल बा । पहिल ओ डुसरा लहरके कोरोना सङ्क्रमण भारतसे अउइया नेपाली दादुभैयाके कारण समुदायमे भुसक आगी जस्टे फैलल् रहे ।
अब्बे सुदूरपश्चिम प्रदेशमे सङ्क्रमितके संख्या ह्वात्ते बह्रल बा । पाछेक एक अँठ्वारमे किल ७२२ जाने सङ्क्रमित थपल बाटै । जौन मध्ये भारतसे आइल व्यक्ति किल ५३० जाने सङ्क्रमित रहल प्रादेशिक स्वास्थ्य निर्देशनालयके कार्यालय जानकारी डेले बा ।
उ कार्यालयके अनुसार पुस २७ गते चार नाकासे एक हजार ६२२ जाने आइल रहिट । जौन मध्ये एक हजार ५८२ जनहनके परीक्षण करेबर १४८ जनहनमे कोरोना सङ्क्रमण पुष्टि हुइल रहे । उहे दिन भारतसे आइल ५० जाने परीक्षण नैकराके घर ओर गैल रहिट ।
ओस्टके, पुस २६ गते आइल एक हजार ४३७ जाने मध्ये एक हजार ३३७ जनहनके परीक्षण हुइल रहे । एक सय जाने परीक्षण नैकराके आइल रहिट । उ दिन ८८ जनहनमे सङ्क्रमण पुष्टि हुइल रहे । ओस्टके, पुस २५ गते चार नाकासे ९८८ जाने आइल रहिट । जौन मध्ये ९७६ जनहनके परीक्षण करेबर ४७ जनहनमे सङ्क्रमण पुष्टि हुइल रहे । १२ जाने भर परीक्षण नैकराइल रहिट ।
पुस २४ गते एक हजार ७३२ जाने स्वदेश आइलमे एक हजार ३४३ जनहनके परीक्षण करल रहे । उ दिन सबसे ढिउर ३८९ जाने परीक्षण नैकराके गन्तव्य ओर लागल रहिट । परीक्षण करल मध्ये १२५ जनहनमे कोरोना सङ्क्रमण पुष्टि हुइल रहे ।
ओस्टके, २३ गते एक हजार ३४५ जाने आइल रहिट । एक हजार १७८ जाने नाकामे कोरोना परीक्षण कराइल रहिट । मने, १६७ जाने भर परीक्षण नैकराके आइल रहिट । उ दिन नाकामे ९७ जनहनमे कोरोना पुष्टि हुइल रहे । पुस २२ गते नाकामे करल परीक्षणमे १०७ जनहनमे कोरोना सङ्क्रमण पुष्टि हुइल रहे । उ दिन एक हजार ५१० जाने स्वदेश आइल रहिट । जौन मध्ये एक हजार २७८ जनहनके परीक्षण करल रहे । २३२ जाने परीक्षण नैकराके घरओर लागल रहिट ।
ओस्टके, पुस २१ गते नाकामे करल परीक्षणमे ४४ जनहनमे कोरोना सङ्क्रमण पुष्टि हुइल रहे । उक्त दिन चार नाकासे एक हजार १८९ जाने आइलमे एक हजार ३६ जनहनके नाकामे परीक्षण करल रहे । १५३ जनहनके भर परीक्षण नैहुइल रहे । उहाँहुक्रे परीक्षण नैकराके गन्तव्य ओर लागल रहिट ।
भारतसे अउइयानके लर्को लागलपाछे नाकामे परीक्षण कैना ओ पोजेटिभ डेखलहुक्रनहे व्यवस्थापन कैना समेत समस्या हुइटी रहल बा । गौरीफन्टा नाकासे आइलहुक्रनके हकमे कैलाली, कञ्चनपुरके जिल्ला स्वास्थ्य कार्यालयसे संयुक्त रुपमे हेल्थ डेस्क राखके परीक्षण करटी रहल बावै ।
नाकासे अउइया सेकटसम सक्कु व्यक्तिनके परीक्षण कैटी रहल जिल्ला स्वास्थ्य कार्यालय कैलालीके प्रमुख लालबहादुर धामी बटैलै ।‘स्रोत साधन ओ हमार जनशक्तिसे भ्याइटसम हम्रे सक्कु जनहनके परीक्षण करटी रहल बाटी’, उहाँ कहलै ।
नाकामे पोजेटिभ डेखल व्यक्तिनहे धनगढी उपमहानगरपालिका–१५ के बेली स्थित आइसोलेसनमे लैजैना करल बा । कुछ व्यक्ति आइसोलेसनमे बैठ्टी रहल ओ कुछ आपन पालिकाके वडा कार्यालयके सिफारिसमे घरमे अइसोलेसनमे बैठ्ना मेरके जैटी रहल धामी बटैलै । ‘वडाके सिफारिसमे आपन घरमे आइसोलेसनमे बैठे चहुइयाहे जाइ डेटी रहल बाटी’, उहाँ कहलै ।‘उहाँ गाडी अपने व्यवस्थापनमे घरओर जैटी रहल बाटै ।’
नाकासे भर पोजेटिभ डेखलहे एम्बुलेन्समे राखके बेली आइसोलेसनसम लैजैना करल बा । उ आइसोलेसन एक सय शैयाके रहल बा । भारतसे अउइया बह्रलपाछे सुदूरपश्चिम प्रदेशमे कोरोना सङ्क्रमितके संख्या ह्वात्ते बह्रल बा । पाछेक एक अँठ्वारके सङ्क्रमण ग्राफ एकदिन बाहेक बाँकी सक्कु दिन उप्पर लागल डेखल बा ।
निर्देशनालयके अनुसार पुस २१ से २७ गतेसम प्रदेशभर क्रमशः ५५, १२०, १५८, ६२, १५९ ओ १९४ जनहनमे कोरोना सङ्क्रमण पुष्टि हुइल बा । पुस २४ गते सङ्क्रमण पुष्टि हुउइयाके सङ्ख्या कुछ कम रहे । मने, ओकरपाछे फेनसे सङ्क्रमणके ग्राफ उप्पर लागल बा । सुदूरपश्चिम प्रदेशमे बुधके २५४ जनहनमे कोरोना संक्रमण पुष्टि हुइल बा ।
