घोडाघोडी नगरपलिकासे सावधानी अपनैना आग्रह
पहुरा समाचारदाता
सुखड, २९ पुस । कोभिड–१९ भाइरसके लावा भेरियन्ट संक्रमण पुनः बह्रे लागलपाछे घोडाघोडी नगरपलिका ८ बुँदे सुचना जारी करले बा । बुधके रात १२ बजेसे लागू हुइना मेरके नि.प्रमुख प्रशासकीय अधिकृत खगेन्द्र बहादुर सिंहसे ८ बुँदे सुचना जारी कैके नगरबासीहुक्रनहे सावधानी अपनैना आह्वान करल हुइट ।
नगरपालिकामे बह्रटी गैल संक्रमणके रोकथाम, नियन्त्रण ओ उपचारहे थप प्रभावकारी बनैना कोभिड–१९ संकट व्यवस्थापन केन्द्र (सिसिएमसी) के सिफारिस एवं गृहमन्त्रालयको नर्णय ओ प्रमुख जिल्ला अधिकारीसे जारी आदेश अनुसार घोडाघोडी नगरपालिकामे बुधके रात १२ बजेसे लागू हुइना मेरके सुचना जारी करल हो ।
सुचना लागू हुइलपाछे एक स्थानमे भौतिक रुपमे २५ जानेसे ढिउर उपस्थित हुइना मेरके सभा, जुलुस, सम्मेलन, प्रर्दशन, भेला, मेला, जात्रा, महोत्सव लगायतके सक्कु कार्य संचालन नैकैना/नैकरैना सुचनामे उल्लेख रहल बा ।
सक्कु आधारभुत तथा माध्यमिक विद्यालय सञ्चालनके हकमे नेपाल सरकार शिक्षा, विज्ञान तथा प्रविधि मन्त्रालयके सुचना समेतहे मध्य नजर कैके २०७८ माघ १५ गते सम्म भौतिक उपस्थितिमे पठनपाठन संचालन नैकैना/नैकरैना, मने पूर्व निर्धारित परिक्षा संचालन कार्यहे भर स्वास्थ्य मापदण्डके पूर्ण रुपमे पालना कैके बसाई व्यवस्थापन सहित संचालन कैना/करैना, सामाजिक, धार्मिक, साँस्कृतिक टरटिहुवार मनाइबर ढिउर मनैनके जमघट नैहुइना मेरके मनैना, सार्वजनिक स्थान होटल, रेस्टुरेन्ट, सिनेमाहल, रङ्गशाला, हवाईयात्रा, उद्यानलगायतमे जाइबर आगामी माघ ७ गतेसे कोभिडविरुद्धके खोप लगाइल कार्ड (मोबाइलमे फोटो हुइलेसे फेन हुइना) साथमे लेके जाइ पर्ना उल्लेख रहल बा ।
चालक, सहचालक ओ सक्कु यात्रुनहे अनिवार्यरुपमे मास्क लगैना, मास्क बिना यात्रुहे सवारी साधन प्रयोग कैना रोक लगैना, सिट क्षमता अनुसार किल यात्रु राखके सार्वजनिक तथा निजी सवारी साधन चलैना, नगरपालिका स्थित सम्पूर्ण सरकारी, गैरसरकारी कार्यालय, उद्योग कलकरखाना, व्यापार व्यवसाय, बैंक ओ वित्तिय संस्था अनिवार्य रुपमे मास्कके प्रयोग कैना, कार्यालयमे सेवा लेहे आइबर अनिवार्य रुपमे मास्क प्रयोग कैना करैना, अत्यावश्यक काम बाहेक घर बाहर निक्रेबर भिडभाड नैकैना÷नैकरैना लगायतके सुचना जारी करल बा ।
