७८ जाने घर दैलोमे पैलै कोरोना खोप सेवा
पहुरा समाचारदाता
जोशीपुर, २९ पुस । कैलालीके जोशीपुर गाउँपालिकाके पुर्ण अशक्त ओ अति अशक्त अपांगता रहल ७८ जाने नागरिक घर दैलामे कोरोना भाइरस विरुद्धके खोप सेवा पैले बटै ।
कर्डएड, लुथरन बिश्व फेडरेसन नेपाल, दिगो विकास समाज भजनी ओ सर्वाङिण अपांगता विकास समाज नेपालके सयुक्त साझेदारीमे तथा जोशीपुर गाउँपालिका स्वास्थ्य शाखाके समन्वयमे गाउँपालिकारहल पुर्ण अशक्त ओ अति अशक्त अपांगता रहल नागरिकहुकनके घर दैलोमे जाके खोप लगाइल रहे ।
कोरोना विरुद्धके खोप सेवा ५० जानेक अवस्था अध्ययन ओ घर टोलमे अपांगता परिचयपत्र वितरण कार्य कार्यक्रमफे कैगिल प्राविधिक सहजकर्ता नन्दराज भट्ट जनैलै । ३ दिन ७ वडामे निरन्तर केगिल अभियानमे असहाय अपांगता रहल नागरिक लाभान्वित हुइल उहाँ जनैलै । पुस २७ गते जोशीपुर गाउँपालिका उपाध्यक्ष गीता कठरिया ओ सर्वाङिण अपांगता विकास समाज नेपालके कार्यकारी निर्देशक नन्दराज भट्ट, फिल्ड सहजकर्ता ईन्द्र बहादुर पाली अभियानके उदघाटन करल रहिट ।
कार्यक्रममे गाउँपालिका स्वास्थ्य शाखा प्रमुख, महिला विकास शाखा प्रमुख दिगो विकास समाज ओ सर्वाङिण अपांगता विकास समाजसे यी गाउँपालिकामे रहल अपांगता नागरिकहुकनके लाग महत्वपूर्ण कार्यक्रम करल बटैलै । अपाङता रहल व्यक्तिहुकनके लाग अनुकरनिय कार्यक्रम करल कहटी सदा तत्पर ओ सहयोगी भुमिकामा रहना गाउँपालिका उपाध्यक्ष कठरिया प्रतिवद्धता व्यक्त करली ।
