वाम लोकतान्त्रिक संयन्त्रके संयोजकमे मन्त्री सोडारी

पहुरा समाचारदाता
धनगढी, ३ माघ । वाम लोकतान्त्रिक गठवन्धनके उम्मेदवारहे जिटैना तीन सदस्यीय सयन्त्र गठन हुइल बा ।

सोम्मार धनगढीमे बैठल तीन दलिय गठवन्धनके बैठकसे नेकपा (एकीकृत समाजवादी) सुदूरपश्चिम प्रदेश सभाके संसदीय दलके नेता दीर्घबहादुर सोडारीके संयोजकत्वमे संयन्त्र बनल हो । संयन्त्रमे नेपाली काँग्रेसके ओरसे नृपबहादु वड ओ नेकपा माओवादी केन्द्रके ओरसे मानवहादुर धामी सदस्य रहल बटै ।

बैठकमे सुदूरपश्चिम क्षेत्रसे राष्ट्रिय सभा सदस्यके उम्मेदवार मदनकुमारी शाह (गरिमा), नारायणदत्त मिश्र ओ जगतबहादुर पार्कीके उपस्थिति रहे । शाह नेकपा (एकीकृत) समाजवादी, मिश्र नेपाली काँग्रेस, पार्की माओवादीके ओरसे उम्मेदवार बटै । शाह महिला, मिश्र खुला तथा पार्की दलित ओरसेके उम्मेदवार हुइट । ओस्टेक करके बैठकमे नेपाली कांग्रेसके प्रदेश सभापति वीरबहादुर वलायर, माओवादीके नेता खगराज भट्ट, नेकपा (एकिकृत समाजवादी) के प्रदेश अध्यक्ष विक्रम शाही ओ जनता समाजवादी पार्टीके नेता तथा प्रदेश सभा सदस्य मालामति राना लगायतके उपस्थिति रहे ।
राष्ट्रिय सभाके चुनाव माघ १२ गते धनगढी हुइटी बा । उ चुनावमे ८८ स्थानीय तहके १७५ जाने प्रमुख तथा उपप्रमुख ओ प्रदेश सभाके ५२ जाने मतदान करही ।