सुदूरपश्चिममे ठप्लै ३४५ कोरोना संक्रमित

सक्रिय संक्रमितके संख्या पुगल १७ सय २१

पहुरा समाचारदाता
धनगढी,३ माघ । सुदूरपश्चिम प्रदेशमे सोम्मारके रोज ३४५ जाने कोरोना संक्रमित ठपलसंगे सक्रिय संक्रमितके संख्या १७ सय २१ पुगल बा ।
सामाजिक विकास मन्त्रालय सुदूरपश्चिम प्रदेश स्वास्थ्य निर्देशनालयसे डेहल जानकारी अनुसार पछिल्का २४ घण्टामे ३ सय ४५ जाने कोरोनाके लौवा संक्रमित ठपल बटै । १ हजार ९० जानेक एन्टीजेन विधिसे परिक्षण करेबेर २ सय ४२ जाने ओ १ सय ८५ जानेक आरटी पीसिआर परिक्षण करेबेर १ सय ३ जानेक पोजेटिभ रिपोर्ट आइल मन्त्रालय जनैले बा । कलेसे १२ जाने ठिक हुके अस्पतालसे डिस्चार्ज हुइल बटै ।

सोम्मारके रोज सुदूरपश्चिम प्रदेशके टमान नाकासे ११ सय ६९ जाने नेपाल लौटेबेर ओइनके एन्टीजेन विधिसे कोरोना चेकजाँच करेबेर १ सय ५४ जनहनमे कोरोना संक्रमण पुष्टि हुइल बा । गडडाचौकीसे ४८२ जाने लौटेबेर ५७ जनहनमे, जुलाघाटसे ३३ जाने लौटेबेर २ जनहनमे, गोैरीफन्टा नाकासे ६५४ जाने लौटेबर ९५ जनहनमे कोरोना डेखल बा । हालसम भारतसे १ लाख ९० हजार ६२९ जाने नेपाल लौटेबेर ५ हजार २६२ जनहनमे कोरोना संक्रमण डेखल मन्त्रालय जनैले बा । 

ओस्टेक सोम्मारके रोज देशभर पछिल्का २४ घण्टामे ६७३४ जनहनमे कोरोना संक्रमण पुष्टि हुइल बा । स्वास्थ्य तथा जनसंख्या मन्त्रालयके अनुसार १७ हजार ४६५ जनहनमे करल नमुना परीक्षणमे ६७३४ जनहनमे संक्रमण पुष्टि हुइल हो । उहे समयावधिमे ३ जनहनके मृत्यु हुइल बा । कलेसे ५४७ जाने ठिक हुके अस्पतालसे डिस्चार्ज हुइल बटै ।
मन्त्रालयके अनुसार अब्बे देशभर ३०८७७ जाने सक्रिय संक्रमित रहल बटै । २४ घण्टामे देशभर १ लाख ४३ हजार ३६० जाने कोभिड १९ विरुद्धके खोप लगैले बटै ।