थारु गाउँमे भल्मन्सा चयन तिब्र
पहुरा समाचारदाता
धनगढी, ६ माघ । थारु समुदायके लौवा बरस माघी टिहुवार अर्थात थारु सम्बत २६४५ सुरुवाट संग्गे थारु गाउँमे लौवा नेतृत्व वडघर/भल्मन्सा/महटाँवा चयन कैना अभियान सुरुवाट हुइल बा ।
थारु समुदायमे एक बर्षे कार्यकालके लाग प्रत्येक बरस लोकतान्त्रिक पद्धतीसे लौवा नेतृत्व चयन करटी आइल हो । माघी डेवानी/भुरा खेलसे कैलाली जिल्ला जिल्लाके कैलारी गाउँपालिका वडा नम्बर ३,उत्तर भर्री पुराने भलमन्सा सन्तराम चौधरी ओ अघारी राकेश चौधरीहे सर्बसहमतिसेसे अशौफे लौवा चयन करल स्थानीय दिनेश चौधरी बटैलै । भल्मन्साहुक्रे मजा कार्य करसे सर्वसहमतसे फेरसे उहीहे दोहरैना चलनफे रहल बा ।
ओस्टेक कैलारी गाउँपालिका–७ रामपुरके भुरा खेलसे भलमन्सामे यूवा रामलाल चौधरी,अघरियागहेन्दर थारु, लेखन् दास लक्ष्मन् थापामगर ओ चौकीदारमे जीतराम चौधरीहे सर्वसहमतिसे चयन करल कैगिल बा ।
ओस्टेक कैलालीके घोडाघोडी नगरपालिका वडा नं. ११ सिसैया गाउँके भल्मन्सामे नरेश चौधरी सर्बसहमत चयन हुइल बटै ।
थारु समुदायके बाहुल्यता रहल उ गाउँके भेलासे चौकीदारमे सुन्दर चौधरी ओ गाउँ सचिवमे पंडितराम कठरियाहे चयन करल हो ।
भल्मन्साके सल्लाहकारमे उदय रावल, श्याम नरेश कठरिया, सिता देवी चौधरी, राम देवी कठरिया, लकन बहादुर चौधरी, पहारी लाल चौधरी, हरि लाल चौधरी लगायत रहल बटै ।
गाउँहुक्रे पुर्व भल्मन्सा हरिलाल चौधरी, सचिव नरेश चौधरी ओ चौकीदार शुसिल चौधरीहे सम्मान सहित बिदाई करले बटै ।
