सुदूरपश्चिममे ठप्लैं ५३४ संक्रमित
देशभरमे १२ हजार ३३८ जनहनमे संक्रमण पुष्टि
पहुरा समाचारदाता
धनगढी, ६ माघ । सुदूरपश्चिम प्रदेशमे विफेक रोज ५ सय ३४ जाने कोरोना भाइरसके संक्रमित ठपल बटै ।
सुदूरपश्चिम प्रदेश सामाजिक विकास मन्त्रालयसे डेहल जानकारी अनुसार पछिल्का २४ घण्टामे २२ सय ८६ जानेक परिक्षण करेबेर ५ सय ३४ जाने कोरोना संक्रमित ठपल हुइट ।
१८ सय ९१ जानेक एन्टीजेन विधिसे परिक्षण करेबेर २ सय ९५ जनहनमे ओ ३ सय ९५ जानेक आरटी पीसिआर विधिसे परिक्षण करेबेर २ सय ३९ जानेक रिपोर्ट पोजेटिभ आइल मन्त्रालय जनैले बा ।
ओस्टेक विफेक रोज १२ जाने रिपोर्ट निगेटिभ आइल जनागिल बा । यी संग्गे प्रदेशमे ३ हजार २१ जाने सक्रिय संक्रमितके संख्या पुगल बा । पछिल्का २४घण्टामे कोरोनासे केक्रो ज्यान नइगिल मने अभिनसम प्रदेशमे ६ सय १६ जानेक ज्यान जासेकल बा ।
विफेक रोज प्रदेशके टमान नाकासे १४ सय ६७ जाने नेपाल भिटरल बटै । ओइनके कोरोना परिक्षण करेबेर १५५ जनहनके रिपोर्ट पोजिटिभ डेखल मन्त्रालय जनैलै । जेम्ने गडडा चौकीसे ९११ जाने, जुलाघाटसे ७०, गौरीफन्टा नाकासे ४६५ जाने, पुलघाटसे २१ जाने नेपाल भिटरल बटै ।
ओस्टेक विफेक रोज देशभर १२ हजार ३३८ जनहनमे कोरोनाभाइरसके संक्रमण पुष्टि हुइल बा । २७ हजार ४८७ जानेक कोरोना परीक्षण करेबेर पीसीआर विधिसे १० हजार ५२ तथा एन्टिजेन विधिसे २२८६ जनहनमे संक्रमण पुष्टि हुइल हो ।
यिहे अवधिमे थप ६४९ जनहनमे संक्रमणमुक्त हुूइल बटै । यी संगे देशभर सक्रिय संक्रमितके संख्या ५७ हजार ३२८ पुगल बा । ओस्टेक, पछिल्का २४ घण्टामे थप ४ जाने कोभिड–१९ संक्रमितके मृत्यु हुइल बा । नेपालमे हालसम ११ हजार ६३२ जाने संक्रमित ज्यान गुमासेकल बटै ।
सीमामे कोरोना परीक्षण ओ खोप
भारतमे कोरोनाके संक्रमण बढटी गैलपाछे भारतसे जोरल कैलालीके दक्षिण–पूर्वी नाका सत्ती भन्सार हुइटी नेपाल प्रवेश कैना सख््यामे वृद्धि हुइल बा । कामके सिलसिलामे भारत गैल नेपाली कोरोना जोखिम बढलसंगे घर लौटेलागलपाछे स्थानीयमे त्रास बढल बा ।
भारतमे दैनिक संक्रमण बह्रटी जाके नागरिक विगत वर्षमे जस्टे बन्दाबन्दी हुइना हो कि कहटी घर लौटे लागल बटै । बर्दियाके राजापुरके सञ्जय चौधरी उहे त्राससे भारत गैल तीन महिनामे घर लौटलै । ‘भर्खर काममे लागल रहु, कोरोनाके संक्रमण बढलपाछे छोरके लौटे परल, उहाँ कहलै ‘पहिल वर्ष महिनौ बन्दाबन्दीमे काम नइकरके बैठेबेर पीडाहे सम्झके फेरसे ओैस्टे हइ की कना डरसे घर लौटल हुँ ।’
अब्बे सत्ती भन्सारसे दैनिक सयौँ नागरिक घर लौटे लागल बटै । खक्रौला हेल्थ डेस्कके प्रमुख मकेन्द्र रोकायाके अनुसार माघीके एक–दुई दिन आघेसम दैनिक ५०० से ढेर नेपाली सत्ती नाकासे प्रवेश करले बटै । कलेसे अब्बेफे उहे सख््यामे नेपाली स्वदेश लौटटी रहल बटै । उहाँ भारतसे नेपाल अइना नागरिकहे विशेष निगरानीमे रख्न करल बटैलै । शंकास्पद व्यक्तिके एन्टिजेट परीक्षण कैना ओ खोप नइलगाइहुकनके सीमामे खोप लगाके पठैना करल बा ।
‘कोरोना परीक्षण कैना करल बटी, परीक्षणके क्रममे कुहीहे पोजेटिभ डेखलेसे टीकापुर अस्पतालसे एम्बुलेन्स मगाके टीकापुरमे होल्डिङ सेन्टरमे रख्न करल बटी, रोकाया कहलै, ‘भारतसे अइना वा भारत जैना नागरिकके लाग खोपकार्ड अनिवार्य कैले बटी, खोप नइलगाइलहुकनके लगाके पठैना करले बटी ।’
सुदूरपश्चिम प्रदेशके प्रमुख प्रतिपक्षी दलके नेता डा रणबहादुर रावल कोरोनाके संक्रमण बढे(बाँकी ३ पेजमे) लागल अवस्थामे सीमानाकामे कडाइ करे पर्ना बटैलै । सत्ती भन्सार कार्यालयस्थित हेल्थ डेस्कके अवस्थाबारे जानकारी लेहे पुगल उहाँ भारतसे अइना नेपाली नागरिकके सीमा क्षेत्रमे कोरोना परीक्षण तथा खोप नइलगाइहुकनहे खोपके व्यवस्था करे पर्नामे जोड डेलै ।
‘पहिलेसे अब्बेक संक्रमणदर उच्च बा, सक्कु जे स्वास्थ्य सावधानी अपनाई सेक्लेसे केल हम्रे कोरोना संक्रमणके जोखिमसे सुरक्षित हुइ सेक्बी, सीमानाकामे सावधानी अपनैना आवश्यक बा । भारतसे अइनाहे सीमामे निगरानी करे सेक्लेसे संक्रमण गाउँगाउँमे फैल्नासे जोखिम कम करे सेक्जाई, रावल कहलै ।
टीकापुर नगरपालिका जनस्वास्थ्य प्रवद्र्धन उपशाखा प्रमुख बलबहादुर रावल सत्ती भन्सारसे नेपाल प्रवेश कैना नागरिकके लाग नगरपालिकासे विशेष सावधानी अपनाइल बटैलै । उहाँ नागरिकके आगमन चापहे हेरके हेल्थ डेस्कमे तीन स्वास्थ्यकर्मी खटाइएको बटैैलै । उहाँ कहलै, ‘दैनिक सकारे ६ से साँझ ६ बजेसम हेल्थ डेस्कसे सेवा प्रवाह हुइटी आइल बा । भारतसे अइना तथा जउइयाके तथ्याङक रख्न करले बटी ।’
खुला सीमा क्षेत्रसे प्रवेश कैना नागरिकहे सुरक्षाके लाग खटल सशस्त्र प्रहरीसे निगरानी कैना करले बटै । ‘कोरोना जोखिम कम कैना प्रयासरत बटी’, रावल कहलै ।
