पुस मसान्तसम ११ बैंकके निक्षेप घटल
काठमाडौं, ७ माघ । चालु आर्थिक वर्षके पुस मसान्तसम ११ वाणिज्य बैंकके निक्षेप घटल बा । असार मसान्तसमके तुलनामे पुस मसान्तसम यी ११ बैंकसे करिब ४५ अर्ब निक्षेप घटल हो ।
राष्ट्रिय वाणिज्य, कृषि विकास, बीओके, सेन्चुरी, ग्लोबल आईएमई, मेगा, नेपाल बंगलादेश, इन्भेस्टमेन्ट, एनआईसी एसिया, प्रभु ओ स्टान्डर्ड चार्टडके निक्षेप घटल बा ।
सरकारी स्वामित्वके राष्ट्रिय वाणिज्य बैंकके किल १९ अर्ब ८९ करोड रुपैयाँ निक्षेप घटल बा । औरे १६ ठो बैंक भर यी आर्थिक वर्षके ६ महिनामे निक्षेप बह्रैना सफल हुइल बा । उ बैंक करिब १ खर्ब ६७ अर्ब रुपैयाँ निक्षेप बह्रैले बा । सनराइज बैंकमे सबसे धेर २१ अर्ब ४४ करोड रुपैयाँ निक्षेप थपल बा । समग्रमे ६ महिनामे वाणिज्य बैंकमे १ खर्ब २२ अर्ब ९५ करोड रुपैयाँ निक्षेप थपल बा ।
असार मसान्तसम कुल ४२ खर्ब १ अर्ब ३९ करोड रुपैयाँ निक्षेप संकलन हुइलमे पुस मसान्तसम कुल ४३ खर्ब २४ अर्ब ३४ करोड रुपैयाँ निक्षेप संकलन हुइल बा । ओहे अवधिमे वाणिज्य बैंक ४ खर्ब २२ अर्ब १७ करोड रुपैयाँ कर्जा बह्रैले बा । असार मसान्तसम कुल ३७ खर्ब २० अर्ब ७५ करोड रुपैयाँ कर्जा प्रवाह हुइलमे ६ महिनामे बह्रके ४१ खर्ब ४२ अर्ब ९२ करोड पुगल बा ।
तरलताहे सहज करना कटि स्थानीय तहमे जैना बजेटके ८० प्रतिशत रकम निक्षेपके रुपमे जम्मा करे पैना व्यवस्था करलेसे फेन फेरसे तरलताके समस्या बह्रे लागल बा । निक्षेपसे कर्जा प्रवाह ढेर हुइलपाछे वाणिज्य बैंकके औसत कर्जामे निक्षेप अनुपात (सीडी रेसियो) फेर ९० प्रतिशत नाघल बा ।
