पत्रकार एलबीके निधनबारे छानविन माग
काठमाडौं, ७ माघ । पत्रकार एलबी विश्वकर्माके निधनके विषयमे निजामती कर्मचारी अस्पतालसे छानविन करके दोषीहे कारबाही करे पर्ना प्रेस काउन्सिल नेपालसे माग करले बा ।
टिभि टुडेमे कार्यरत पत्रकार एलबी विश्वकर्माके बिफेक रोज पाटन अस्पतालमे निधन हुइल रहे । उपचारके लाग निजामति कर्मचारी अस्पताल पुगल विश्वकर्माहे कम पैसा अपुग हुइल कारण उ अस्पतालसे भर्ना नइकरके पाटन अस्पताल रिफर करल कहटी आफन्तजनसे उहाँक निधनके दोष निजामती कर्मचारी अस्पतालहे डेहल समाचार बाहेरल बटै ।
यिहे सन्दर्भमे प्रेस काउन्सिल नेपालके अध्यक्ष बालकृष्ण बस्नेत नेतृत्वके टोलीसे शुकके अस्पताल प्रशासन पुगके अस्पतालसे करल लापरबाहीके सम्बन्धमे छानविन करके दोषीउपर कारबाहीके माग करल हो । अध्यक्ष बस्नेतसे अस्पतालसे सत्यतथ्य छानविन करके दोषिहे कारबाही करे पर्ना तथा पीडित परिवारहे क्षतिपूर्ति डेहे पर्ना विषयमे अस्पताल प्रशासनसंग बाट हुइल बटैलै ।
उहाँ कहलै– ‘हमार एलबिजीके मृत्यु सन्दर्भमे टमान बाट बाहेर अइलै । मध्यराती सिभिल हस्पिटलमे कम पैसा बुझाई नइसेकल कारणसेफे उहाँके समयमे उपचार नइहुइल ओ मृत्यु हुइल कना विषयमे बाट उठल हुइल ओरसे यी विषयमे ध्यानाकर्षण करैना हम्रे वहाँ पुगल रही ।
यदि अस्पतालके लापरबाही हो कलेसे उ बाट मिडियामे आइल बा, उ विषयमे छानविन होए । ओ दोष उप्पर कारबाही होए । पीडितहे क्षतिपूर्ति देहुवइक लाग हम्रे प्रेस काउन्सिल नेपालके टिमसे शुकके अस्पताल प्रशासनमे बाट धारल बटी । उहाँहुक्रे गम्भिर बटै । हम्रे कुछ दिन हेरबी, उहाँहुक्रे कैसिन खालके छानविन करठै, प्रतिवेदन बुझैही ओ दोषीहे कारबाही करही ।’
अध्यक्ष बस्नेत अस्पताल का कैसिन प्रक्रिया आघे बढाइठ कुछ दिन पर्खन ओ उहे अनुसार प्रेस काउन्सिलसे कदम चल्ना बटैलै । अछामके रामारोशन गाउँपालिका ५ स्थायी घर रहल २६ वर्षीय पत्रकार एलबी विश्वकर्मा काठमाडौंमे बैठके सक्रिय पत्रकारिता करटी रहिट ।
