विद्युत् सञ्चालनके सम्झौता रद्द कैना सहमति
बाजुरा, ०९ माघ । बाजुरा सदरमुकाम मार्तडीमे सञ्चालन हुइटी रहल त्रिवेणी साना जलविद्युत् केन्द्र नेपाल विद्युत् प्राधिकरणसे फिर्ता लेना हुइल बा ।
प्राधिकरण ओ त्रिवेणी सहकारी संस्थाबीचके २० वर्षके लाग हुइल सम्झौता खारेज करके अपन स्वामित्वमे सञ्चालन कैना करके सहमति हुइल नेपाल विद्युत् प्राधिकरण वितरण केन्द्र बाजुरा जनैले बा ।
सदरमुकाममे विद्युत् आपूर्ति नइहुके बारबार सेवाग्राही आन्दोलन कैना, धर्ना कैना जैसिन कार्य हुइटी आइल ओरसे उ विद्युतमे राष्ट्रिय प्रसारण लाइन जडान कैना करके तीन महिनाभिटर सम्झौता रद्द कैना सहमति हुइल वितरण केन्द्रके प्रमुख ललितकुमार मण्डल बटैलै ।
प्राधिकरणसे तीन महिनाभिटर त्रिवेणी बचत तथा ऋण सहकारी संस्थासँगके सम्झौता खारेज करके पुनः अपने स्वामित्वमे लेना पत्र जिल्ला वितरण कार्यालयहे पठाइल मण्डल जानकारी डेलै । साना जलविद्युत् केन्द्र निर्माण हुके सेवा सञ्चालन करेबेर ७४५ ग्राहकहे सेवा डेना सर्तसहित मार्तडी साना जलविद्युत् केन्द्र सञ्चालनके जिम्मा त्रिवेणी सहकारीसे लेहल रहे ।
विसं २०६६ मे सञ्चालनके स्वामित्व लेहल सहकारीसंग हाल दुई हजार १०० ढेर विद्युत् सेवा लेना ग्राहक रहल बटै ।
दैनिक ८०० किलोवाट क्षमतासे ढेरके विद्युत् खपत हुइना हुइलेसेफे सहकारीसे २०० किलोवाट क्षमता केल वितरण करटी रहल बा । यकर कारण दैनिक पाँचसे १० घण्टा विद्युत् अवरुद्ध हुइना समस्यासे सेवाग्राही हैरानी बनल बटै ।
मागअनुसारके विद्युत् पूर्ति कैना त्रिवेणीसे नइसेक्ना हुइलपाछे फिर्ता कैना सहकारीफे तयार डेखल बा । प्रधिकरणसे तीन महिनाभिटर विद्युत् सम्झौता रद्द करके अपने स्वामित्वमे सञ्चालन कैना प्रक्रिया सुरु करसेकल बा ।
