सुदूरपश्चिममे संक्रमण दर घटल
३८७ ठपेबेर, ४० चोखैल
पहुरा समाचारदाता
धनगढी,९ माघ । सुदरपश्चिम प्रदेशमे एक अठुवारसे कोरोना संक्रमण दर एकदम जोरसे बह्रटी गिलसेफे दुई दिनयहोर भर संक्रमण दर पहिलेक तुलनामे घटल बा ।
सुदूरपश्चिम प्रदेश सामाजिक विकास मन्त्रालय स्वास्थ्य निर्देशनालयसे डेहल जानकारी अनुसार दुई दिन यहोर पहिलेक तुलनामे संक्रमणदर घटल डेखल हो ।
मन्त्रालयसे पछिल्का २४ घण्टाके रिपोर्ट सार्वजनिक करटी अँटवार १३ सय ६९ जानेक परिक्षण करेबेर ३ सय ८७ जनहनमे संक्रमण पुष्टि हुइल हो । जेम्ने १२ सय ८६ जानेक एन्टीजेन ओ ८३ जानेक आरटी पीसिआर विधिसे कोरोना परिक्षण करल रहे । अँटवार ४० जाने कोरोना मुक्त हुइल बटै ।
ओस्टेक गैल शनिच्चरके रोज १३ सय ४४ परिक्षणमे ३८८, शुकके रोज २२ सय ५० परिक्षणमे ५६५, विफे रोज २२ सय ८६ परिक्षणमे ५३४, बुधके रोज १७ सय ४८ परिक्षणमे ४७७, मंगरके १५ सय ३६ परिक्षणमे ३८८, सोम्मार १२ सय ७५ परिक्षणमे ३४५ जहननमे संक्रमण पुष्टि हुइल मन्त्रालय जनैले बा ।
अब्बेसम प्रदेशमे आरटी पीसिआरके १५ सय ६५ ओ एन्टीजेनके २३ सय ७ करके ३८ सय ७२ जाने सक्रिय संक्रमितके संख्या रहल बा । ओस्टेक अँटवार प्रदेशके टमान नाकासे ८ सय ६२ जाने नेपाल भिटरलमे १ सय ५१ जनहनमे कोरोना संक्रमण डेखल मन्त्रालय जनैले बा ।
ओस्टेक पछिल्का २४ घण्टामे देशभर कोरोना संक्रमितके संख्या घटल बा । स्वास्थ्य मन्त्रालयके अनुसार १७ हजार ४३७ ठो नमुना परीक्षणमे ६ हजार ४६२ जनहनमे संक्रमण पुष्टि हुइल बा । यी आघे शनिच्चर २० हजार १८७ जनहनमे परीक्षण करेबेर १० हजार २५४ जनहनमे संक्रमण पुष्टि हुइल रहे ।
ओस्टेक पछिल्का २४ घण्टामे १४ सय १६ जाने संक्रमणमुक्त हुइल बटै कलेसे उहे अवधिमे ४ जाने ज्यान गुमैले बटै । हाल देशभर कोरोनाके सक्रिय संक्रमित ७७ हजार ४० पुगल बटै ।
संक्रमितमन्से ८८ प्रतिशतमे ओमिक्रोन भेरियन्ट
नेपालमे कोरोना संक्रमण पुष्टि हुइल मन्से ८८ प्रतिशतमे नयाँ भेरिएन्ट ओमिक्रोन रहल स्वास्थ्य तथा जनसंख्या मन्त्रालय जनैले बा ।
टेकुस्थित राष्ट्रिय प्रयोगशालमे एस जीन पोजेटिभ हुइल ३२ नमुनाके जिन सिक्वेन्सिङ करेबेर २८ ठो नमुनामे ओमिक्रोन ओ चार नमुनामे डेल्टा भेरिएन्ट पुष्टि हुइल स्वास्थ्य तथा जनसंख्या मन्त्रालयके सह–प्रवक्ता डा. समिरकुमार अधिकारी जानकारी डेलै ।
एस जीन पोजेटिभ हुइल ८८ प्रतिशतमे ओमिक्रोन पुष्टि हुइल उहाँ जानकारी डेलै । यी नतिजा हेरेबेर नेपालमे फे और मुलुकमे जस्टे ओमिक्रोन भेरियन्टसे डेल्टाहे प्रतिस्थापन करल डा.अधिकारीके कहाई बा ।
