मानसिक स्वास्थ्य तथा तनाव व्यवस्थापन अभिमुखीकरण
पहुरा समाचारदाता
धनगढी, ९ माघ । कैलालीके कैलारी गाउँपालिकास्थित हसुलियामे अँटवारके रोज घरेलु हिंसासे मानसिक स्वास्थ्यमे पर्ना प्रभाव ओ तनाव व्यवस्थापन अभिमुखीकरण हुइल बा ।
मितिनी नेपाल, कोशिस र युथ थिंकर सोसाइटीके आयोजना तथा युएन वुअनके सहयोगमे स्वास्थ्य स्वयंसेविका, टमान समुदायके व्यक्तिहुकनबीच अभिमुखीकरण कार्यक्रम कैगिल हो ।
कार्यक्रममे कैलारी गाउँपलिकाके स्वास्थ्य प्रमुख वीरेन्द्र सापकोटा गाउँपालिका सक्कु मानसिक समस्याहे ध्यानमे रख्टी वडा नम्बर ८ उदासीपुरके स्वास्थ्यचौकीसे डिप्रेसन, मृगी, साइकोसिस, ओ एपिलिप्सी रोग सम्बन्धी औषधी निःशुल्क उपलब्ध करैटी आइल बटैलै । उहाँ २÷२ जाने परामर्शदाता ओ ट्रेनरहुकनकेफे वेवस्था रहल बटैलै ।
मानसिक समस्या रहल व्यक्तिहुकनहे निःशुल्क स्वास्थ बिमाफे करैटी आइल स्वास्थ्य प्रमुख सापकोटा बटैलै । कार्यक्रममे कोसिस नेपाल सुदूरपश्चिम प्रदेशके मनोपरामर्शकर्ता पशुपती खाती खड्का सहजीकरण करल रहिट । उहाँ यी संस्थासे मानसिक स्वास्थ्य समस्यासम्बन्धी कार्यक्रम करटि आइल बटैलि । उहाँ कुहिहे मानसिक समस्या परलेसे पैसा नैलग्ना फोन नम्बर १६६०१०५६७१५ मे फोन कैके सल्लाह लेहे सेक्ना फेन बटैलि ।
वडा नम्बर ८ स्थित स्वास्थ्य चौकीसे ८३ जाने मानसिक स्वास्थ्य समस्या रहल व्यक्तिहुक्रे उपचार करैटिरहल बटैं । जेम्ने छारेरोगके ४० जाने, मानसिक असन्तुलन रहल १६ जाने, डिप्रेशनके ७ जाने, चिन्तारोगके १८ जाने ओ सुस्तमनस्थिति रहल २ जाने रहल स्वास्थ्य चौकीके इञ्चार्ज रामकिशोर चौधरी बटैलैं ।
