एसईईके परीक्षा वैशाखमे हुइना
काठमाडौं, ९ माघ । राष्ट्रिय परीक्षा बोर्डसे माध्यमिक शिक्षा परीक्षा (एसईई) वैशाखमे ओ कक्षा १२ के परीक्षा जेठमे कैना जानकारी डेले बा ।
शनिच्चरके बैठल बोर्डके बैठकसे एसईई वैशाखमे ओ १२ के जेठमे कैना निर्णय करल बोर्डके अध्यक्ष महाश्रम शर्मा जानकारी डेलै ।
उहाँ कहलै, ‘अब्बेसमके परिस्थितिमे एसईई वैशाखमे ओ जेठमे १२ के परीक्षा कैना हम्रे निर्णय करले बाटी । आब हाली परीक्षा तालिका सार्वजनिक करब ।’
कोभिडके कारण इ बरसके शैक्षिक सत्रके पठनपाठन कुछ ढिला हुइल ओरसे परीक्षा कुछपाछे कैना निर्णय बोर्डसे करल उहाँ बटैलै ।
कोभिडके कारण विद्यालय बन्द हुइल ओरसे बोर्डसे तोकल समयावधिके अवस्था हेरके कौन मोडालिटीमे परीक्षा कैना कना निर्णय कैना शर्मा बटैलै । उहाँ कहलै, ‘अब्बेक समयहे हेरके परीक्षा करे सेक्ना सक्कु परिस्थितिहे आंकलन कैके हम्रे कौन मोडालिटीसे कैना कना बात ठोरचे पाछे करब ।’
इ बरसके शैक्षिक सत्रहे समस्या नैपर्ना मेरके विद्यार्थीके सुविधाहे ध्यानमे राखके चैतभर पठनपाठन कैना ओ वैशाखमे परीक्षा कैना निर्णय बोर्डसे करल जनाइल बा ।
यहोर बोर्डसे इहे शैक्षिक सत्रसे कक्षा १० के परीक्षा प्रदेशस्तरीय बनैना तयारी करल जनाइल बा ।
संविधानसे, शिक्षा ऐन कक्षा ८ के स्थानीयस्तरीय कक्षा १० के प्रदेशस्तरीय ओ कक्षा १२ के राष्ट्रियस्तरीय हुइ पर्ना व्यवस्था करल अनुरुप कैना तयारी हुइटी रहल बोर्डके अध्यक्ष शर्मा बटैलै ।
‘संविधानके मर्म अनुसार परीक्षाके व्यवस्थापन हुइ परल । आब हुइना परीक्षा उहे अनुसार व्यवस्था हुइ परल कना लाइनसे ढिउर बात हुइल बावै ।’ उहाँ कहलै, ‘प्रदेशहे व्यवथापकीय पक्षमे कैसिक ढिउर संलग्नता करैना कना छलफल हुइटी रहल बा । इहे बरससे प्रदेशस्तरीय करैना तयारीमे जुटल बाटी ।’
बोर्डसे आब संघीय शिक्षा ऐन फेन उहे अनुरुप बने परल कहिके काम कैटी रहल समेत शर्मा जानकारी डेलै ।
