अशक्त अपांगता रहल नागरिकहे घर दैलोमे खोप सेवा

पहुरा समाचारदाता
कञ्चनपुर, ९ माघ । कञ्चनपुर जिल्लाके भीमदत्त नगरपालिकाके १९ वडामे अशक्त अपांगता रहल नागरिकहे घर दैलोमे कोरोना भाइरस विरुद्धके खोप सेवा प्रदान कैगिल बा ।

कर्डएड, लुथरन विश्व फेडरेसन नेपाल, राष्ट्रिय मुक्त हलिया समाज महासंघ ओ सर्वाङिण अपांगता विकास समाज नेपालके सयुक्त साझेदारीमे अशक्त अपांगता रहल नागरिकहे घर दैलोमे कोरोना भाइरस विरुद्धके खोप सेवा प्रदान कैगिल हो ।
कंचनपुर जिल्लाके भीमदत्त नगरपालिका स्वास्थ्य शाखाके समन्वयमे नगरपालिकाके पुर्ण अशक्त ओ अतिअशक्त अपांगता रहल नागरिकहुकनके घर दैलोमे पुगके कोरोना विरुद्धके खोप सेवा सहित अपांगता सहायक सामग्री नापजाँच तथा वितरण अवस्था अध्ययन ओ घर टोलमे अपांगता परिचयपत्र सम्बन्ध सचेतीकरण कार्यक्रम अभियानके रूपमे संचालन कैगिल कार्यक्रमके प्राविधिक सहजकर्ता नन्दराज भट्ट जानकारी डेलै ।

अशक्त ओ असहाय पुर्ण अपांगता नागरिकहे घर दैलोमे जाके सेवा डेना उद्देश्यके साथ नगरपालिकाका १९ ठो वडामे यी अभियान संचालन हुइल भट्ट बटैलै । ५ दिनसम १९ वडामे निरन्तर अभियान संचालन करके करिब २५० जाने असहाय अपांगता रहल अति अशक्त नागरिक लाभान्वित हुइना लक्ष्य साथ कार्यक्रम संचालन करल उहाँ जानकारी डेलै । उ खोप अभियान माघ ७ गते भीमदत्त नगरपालिका स्वास्थ्य शाखा प्रमुख नरेन्द्रराज जोशी, जिल्ला स्वास्थ कार्यालय कंचनपुरके खोप विभाग प्रमुख जनक कुवँर ओ सर्वाङिण अपांगता विकास समाज नेपालके कार्यकारी निर्देशक नन्दराज भट्ट, अपांगता समन्वय समिति सदस्य जीवनकुमार भट्ट, राष्ट्रिय मुक्त हलिया समाज महासघके कार्यक्रम संयोजक लक्ष्मी लुहारसे सुरुवात करल रहिट ।

कार्यक्रममे नगरपालिका स्वास्थ्य शाखा प्रमुख, ३ नम्बर वडा अध्यक्ष ओ ६ नम्बर वडाके सदस्य दलबहादुर बोहरा आ–अपन स्थानमे सहाजीकरण करल रहिट । उहाँहुक्रे यी अभियानसे नगरपालिकामे रहल अपांगता नागरिकहुकनके लाग महत्त्वपूर्ण कार्यक्रम नन्ना ओ एकीकृत घुम्ती सेवा जनताके घर दैलोमे जाके सेवा प्रवाह कैना काम सह्रानिय ओ प्रशासनिय बटैलै ।

समाजमे रहल असहाय वर्गहे अपेक्षाकृत अनुसार खोप लगाई नसेकल अवस्थामे यी अभियानसे दैनिक ५० जनताहे घर दैलोमे अवस्था अध्ययनसहितके खोप सेवा डेना महान तथा अनुकरनिय कार्य रहल बटैलै । कार्यक्रम करे अइना संघ सस्थाहुकनहे पालिका परिवार सदा तत्पर ओ सहयोगी भुमिकामे रहना नगरपालिका नगर उप प्रमुख तथा अपांगता समन्वय समिती संयोजक सुशीला चन्द सिंह प्रतिबद्धता व्यक्त करली ।