कैलालीमे सिटामोल अभाव
पहुरा समाचारदाता
धनगढी, १० माघ । कोरोना संक्रमण बह्रलसंगे सिटामोलके माग अत्यधिक बह्रेबर धनगढीके मेडिकलमा फेन अभाव सृजना हुइ लागल बा ।
एक/दुई महिनासे निजी मेडिकल ओ स्टोरमे सिटामोलके अभाव हुइल हो । कोभिड–१९ संक्रमणके टिसरा लहर सुरु हुइलसँगे सिटामोलके माग बह्रलपाछे अभाव सुरु हुइल बा । बजारमे सिटामोल अभाव हुइ लागलपाछे इ बेला उपभोक्ताहुक्रनहे समस्या हुइल बा । आपूर्तिमे कमी आइलपाछे समस्या सृजना हुइल व्यवसायीहुक्रनके कहाइ रहल बा ।
उपभोक्ता स्टकमे राखेबर ओ आपूर्ति नैहोके सिटामोलके अभाव हुइल अमित डिस्ट्रीव्युटर्सके रामसेवक चौधरी बटैलै । दुई महिना यहोर बजारमे सिटामोल आपूर्तिमे कमी रहल उहाँ बटैलै ।
कुछ समयसे सिटामोलके सहज आपूर्ति नैहोके समस्या हुइल सेती प्रादेशीक अस्पताल फार्मेसीके ईन्चार्ज लक्ष्मी चौधरी बटैली । अब्बे अस्पतालके फार्मेसीमे १५ सय ट्याबलेट रलेसे फेन इ मौज्दात प्रयाप्त नैरहल उहाँके कहाइ बा ।
औरे औषधिके अवस्था ठिक अवस्थामे रहलेसे फेन सिटामोलके भर १२ दिनके लाग किल रहल उहाँके कहाइ रहल बा । बजारमे सिटामोल अभाव हुइना हल्ला चलल्सँगे उपभोक्ता फेन औषधिके जोहो करे लागलपाछे कुछ अभाव रहल धनगढी उपमहानगरपालिकाके स्वास्थ शाखा प्रमुख कृष्ण बोहरा बटैलै ।
नागरिक नै अनावश्यक रुपमे खरिद कैके घरमे सिटामोल थन्क्याइबर इ समस्या डेखल उहाँके कहाइ रहल बा । बजारमे अभाव हुइल सिटामोलहे लेके कालोबजारीके आशंका हुइटी रहल बेला अँट्वारके रोज बजार अनुगमन करल बा । अनुगमनके क्रममे सहायक प्रमुख जिल्ला अधिकारी हिरालाल चौधरी बजारमे रहल औषधि पसलमे माग अनुसार औषधि आपूर्ति नैहुइल बटैलै ।
उहोर जिल्ला स्वास्थ कार्यालय भर तत्काल सिटामोलके अभाव नैहुइना बटैले बा । तथ्यांक अनुसार कैलाली जिल्लामे रहल सरकारी अस्पताल स्वास्थ संस्थामे १८ लाख ट्याबलेट मौज्दात रहल उ कार्यालयके प्रमुख लालबहादुर धामी बटैलै । जिल्लामे १८ लाख एक हजार १४७ ट्याबलेट रहल ओरसे दुई महिनासम पुग्ना उहाँके कहाइ रहल बा ।
