सेती प्रादेशिक अस्पतालके परिक्षणमे १६७ जनहनमे संक्रमण पुष्टि

पहुरा समाचारदाता
धनगढी, १० माघ । सेती प्रादेशिक अस्पतालमे पछिल्का २४ घण्टामे कैगिल कोरोना परिक्षणमे १ सय ६७ जनहनमे कोरोना भाइरस संक्रमण पुष्टि हुइल बा ।

आरटी पीसिआर विधिसे २ सय ७६ जानेक कोरोना परिक्षण करेबेर १ सय ६७ जनहनमे कोरोना भाइरस संक्रमण पुष्टि हुइल अस्पतालके सूचना अधिकारी दिलिप श्रेष्ठ बटैलै । सेती प्रादेशिकके कोरोना अस्पतालके १९ जनहनके उपचार हुइटी रहल ओ पछिल्का २४ घण्टामे ९ जाने भर्ना हुइल उहाँ जनैलै ।

पछिल्का २४ घण्टामे २ जाने आइसियूमे भर्ना हुइल एक जाने धनगढी उपमहानगरपालिका–१ के ७७ बरसके पुरुषके ज्यान गैल सूचना अधिकारी श्रेष्ठ बटैलै । सेती प्रादेशिक अस्पतालमे १ लाख २२ हजार ६०१ जानेक स्वाब संकलन करके परिक्षण करेबेर २२ हजार ६३७ जनहनमे पोजेटिभ ओ ९९ हजार ९६४ जनहनमे निगेटिभ रिपोर्ट आइल जनागिल बा ।