कैलारीके नवौं अधिवेशन सुरु, छ विधेयक पेस

पहुरा समाचारदाता
धनगढी, ११ माघ । कैलालीके कैलारी गाउँपालिकाके नवौं अर्थात हिउँदे÷विधेयक अधिवेशन मंगरसे सुरु हुइल बा ।

कोरोना महामारीहे मध्यनजर कैके उ गाउँपालिका स्वास्थ्यके मापदण्ड पालना कैटी नवौं अधिवेशन सुरु करल हो । कोरोना संक्रमण बह्रटी रहल कारण गाउँपालिकाके गाउँ सभा हलमे सभा सञ्चालन नैकैक, गाउँपालिकाके औरे बरवार हलमे सभाके उद्घाटन करल बा ।

गाउँ सभा एवम् गाउँपालिकाके अध्यक्ष लाजुराम चौधरी विधेयक अधिवेशनके उद्घाटन करल रहिट । सभामे विधेयक समितिका संयोजक राजेश सुनार छ ठो विधेयक पेश करल रहिट । उहाँ कैलारी गाउँपालिकाके भलमन्सा/बडघर प्रणाली संरक्षण, सम्बद्र्धन ओ विकास ऐन २०७८, कैलारी गाउँपालिकाके स्थानीय सेवा ऐन २०७८, कैलारी गाउँपालिकाके युवा नीति २०७८ सभामे पेश करल गाउँपालिकाके प्रवक्ता कमलप्रसाद चौधरी जानकारी डेलै ।

ओस्टके, कैलारी गाउँपालिकाके अनुगमन तथा सुपरीवेक्षण समिति कार्यविधि २०७८, कैलारी गाउँपालिकाके बजेट तथा कार्यक्रम तर्जुमा समिति कार्यविधि २०७८ हे समितिसे गाउँ सभामे पेस करल बा । ओस्टके, कैलारी गाउँपालिकाके स्थानीय राजस्व समिति सञ्चालन कार्यविधि २०७८ फेन सभामे पेस करल बा ।

गाउँ सभामे पेस हुइल विधेयकउपर आगामी माघ २४ गतेके गाउँ सभामे छलफल हुइना प्रवक्ता चौधरी जानकारी डेलै ।

कैलारी गाउँपालिकाके गाउँ सभासे हालसम ५२ ठो ऐन, कानून निर्माण हुइल बा । स्थानीय सरकारके कामकारबाहीहे आघे बह्रैनासे लेके अति आवश्यक ऐन, कानून बनाइल हो ।

हालसम ऐन १२ ठो, कार्यविधि २६ ठो, निर्देशिका छ ठो बनल गाउँपालिका प्रवक्ता चौधरी जानकारी डेलै । ओस्टके, नियमावली ओ नीति तीन÷तीन, मापदण्ड ओ दिग्दर्शन एक÷एक ठो निर्माण हुइल उहाँ बटैलै ।

गाउँ सभामे गाउँपालिका उपाध्यक्ष लक्ष्मी सत्गौंवा, गाउँ सभा सदस्य, गाउँपालिकाके प्रमुख प्रशासकीय अधिकृत खगेन्द्रराज जोशी, गाउँपालिकाके कर्मचारीके उपस्थिति रहल रहे ।