राष्ट्रिय सभा निर्वाचन आज
सुदूरपश्चिम प्रदेशके लाग प्रदेशसभा भवनमे मतदानस्थल
पहुरा समाचारदाता
धनगढी, १२ माघ । आज हुइना राष्ट्रिय सभा सदस्यके लाग सुदूरपश्चिम प्रदेशके लाग प्रदेशसभा भवनमे मतदानस्थल तोकल बा ।
निर्वाचन आयोगके अनुसार सुदूरपश्चिम प्रदेशके लाग तीन, प्रदेश १ मे तीन, मधेस प्रदेशमे दुई, बागमतीमे दुई, गण्डकीमे तीन, लुम्बिनीमे तीन, कर्णालीमे तीन करके १९ पदके लाग बुधके सकारे ९ बजेसे अपराह्न ३ बजेसम निर्वाचन हुई लागल हो ।
जेकर लाग देशभर आठ मतदानस्थलमे १४ ठो मतदान केन्द्र तोकल बा । प्रदेश १ मे प्रदेश निर्वाचन कार्यालय विराटनगरमे ओ बाली संरक्षण प्रयोगशाला विराटनगरमे मतदान स्थल तोकल आयोग जानकारी डेले बा ।
मधेस प्रदेशके लाग महेन्द्रनारायण निधि भवनमे, बागमती प्रदेशके लाग औद्योगिक क्षेत्र व्यवस्थापन लिमिटेडके सभागृहमे, गण्डकी प्रदेशके लाग प्रदेश निर्वाचन कार्यालय पोखरामे लुम्बिनी प्रदेशके लाग दाङके घोराहीस्थित कर्मचारी मिलन केन्द्रमे, कर्णाली प्रदेशके लाग प्रदेश निर्वाचन कार्यालय सुर्खेतमे मतदानस्थल तोकल बा ।
सक्कु तयारी पूरा
निर्वाचन आयोगसे राष्ट्रियसभा सदस्य १९ पदके लाग आज (बुधके) हुइना निर्वाचनके सम्पूर्ण तयारी पूरा करले बा । शान्ति सुरक्षा, स्वास्थ्य मापदण्ड तथा निर्वाचनस्थल ओ केन्द्र निर्माणलगायत करे पर्ना निर्वाचन व्यवस्थापनके सक्कु तयारी पूरा हुइल आयोगके प्रवक्ता शालिग्राम पौडेल जानकारी डेलै । उहाँ कहलै, ‘कुछ स्थानमे सामान्य बुथ निर्माण ओ सर्वदलीय बैठक करे पर्ना बाहेक निर्वाचन व्यवस्थापनके लाग करे पर्ना शान्ति सुरक्षा, स्वास्थ्य मापदण्डलगायत और सक्कु तयारी पूरा हुसेकल बा ।
निर्वाचनके मौनअवधि सुरु हुसेकल ओरसे प्रचार–प्रसार रोकल बा कलेसे निर्वाचनमे खटन सुरक्षाकर्मी, निर्वाचन कर्मचारी ओ स्वास्थ्यकर्मीसहितके टोलीके व्यवस्थापन हुसेकल बा ।
अइना फागुन २० गते नेकपा (एमाले) के आठ, नेकपा (एकीकृत समाजवादी) के चार, नेकपा (माओवादी केन्द्र) के चार ओ नेपाली कांग्रेसके तीन राष्ट्रियसभा सदस्यके पदावधि समाप्त हुइना हुइल ओरसे रिक्त स्थानके लाग निर्वाचन हुइ लागल हो । सदस्यके पदावधि समाप्त हुइना ३५ दिनआघे निर्वाचन करे पर्ना प्रावधान बा । संघीय संसद प्रतिनिधित्व कैना नौ राजनीतिक दलके उम्मेदवार चुनावी मैदानमे बटै ।
आयोगके अनुसार नेपाली कांग्रेस, नेकपा (एमाले), नेकपा (माओवादी केन्द्र), नेकपा (एकीकृत समाजवादी), राष्ट्रिय जनमोर्चा, लोकतान्त्रिक समाजवादी पार्टी नेपाल, नेपाल मजदुर किसान पार्टी, जनता समाजवादी पार्टी नेपाल ओ राष्ट्रिय प्रजातन्त्र पार्टीसे निर्वाचनमे भाग लेले बटै ।
निर्वाचनके लाग प्रदेशसभा सदस्य तथा पालिका प्रमुख ओ उपप्रमुख करके दुई हजार २५ मतदाता कायम बा । निर्वाचनमे प्रदेशसभा सदस्यके मतभार ४८ ओ पालिका प्रमुख ओ उपप्रमुखके मतभार १८ हुई । निर्वाचनमे स्थानीय तहके एक हजार ४९३ ओ प्रदेशसभाके ५३२ मतदाता रहिही ।
निर्वाचनसे सात महिला, तीन दलित, दुई अपाङता हुइल व्यक्ति वा अल्पसंख््यक ओ सात और समूहके उम्मेदवार निर्वाचित हुइही । प्रबुद्ध वर्गके प्रतिनिधित्व रहन ५९ सदस्सीय राष्ट्रियसभाके एकतिहाइ सदस्य प्रत्येक दुई वर्षमे पदावधि समाप्त हुइना सवैधानिक व्यवस्था बा ।
स्थानीय तहके निर्वाचन मिति तत्काल तोक्न निर्वाचन आयोगके आग्रह
निर्वाचन आयोगसे स्थानीय तहके निर्वाचन मिति यथाशीघ्र तोक्न सरकारहे आग्रह करले बा । मंगरके रोज विज्ञप्ति सार्वजनिक करटी आयोगसे यैसिन आग्रह करल हो । २०७४ वैशाख ३१ गते पहिल, असार १४ गते दुसरा ओ कुवाँर २ गते टिसरा चरणमे सम्पन्न हुइल ओरसे जनप्रतिनिधिके पदावधि सेके लागल कहटी आयोगसे यैसिन आग्रह करल हो ।
आयोगके सहसचिव एवम् प्रवक्ता शालिग्राम शर्मा पौडेलसे मंगरके विज्ञप्ति सार्वजनिक करटी स्थानीय तह निर्वाचन ऐन, २०७३ के व्यवस्था अनुसार स्थानीय तहके सक्कु निर्वाचित पदाधिकारीके कार्यकाल २०७९ जेठ ५ गते समाप्त हुइना कहटी यैसिन आग्रह करल हो ।
विज्ञप्तिमे स्थानीय तह निर्वाचन ऐन, २०७३ के दफा ४ के व्यवस्था बमोजिम स्थानीय तहके कार्यकाल समाप्त हुइना आघे स्थानीय तहके निर्वाचन कैना आग्रह करल त्रबा । सरकारहे निर्वाचनके सम्बन्धमे संवैधानिक तथा कानुनी व्यवस्थाबारे जानकारी कराइल विज्ञप्तिमे उल्लेख बा ।
