सुदूरपश्चिमसे गठबन्धनके तिनु जाने उम्मेदबार बिजयी
पहुरा समाचारदाता
धनगढी १३ माघ । राष्ट्रियसभा सदस्यमे सुदूरपश्चिमसे गठबन्धनके तिनु जाने उम्मेदबार बिजयी हुइल बटै । राष्ट्रिय सभाके काँग्रेसके ओरसे उम्मेदबार बनल नारायण मिश्र, समाजवादीके गरिमा शाह, दलित ओर उम्मेदबार माओवादीके जगत पार्की विजयी हुइल बटै ।
मिश्रके प्रदेशसभाओर १८७२ मतभार ओ स्थानीय तहओरसे १८७२ मतभार पाके निर्वाचित हुइल बटै । उहाँ अपन प्रतिद्वन्द्वी एमालेके ओरके उम्मेदबार डिल्लीराज भट्टहे पराजय करल हुइट । भट्ट प्रदेशओर ६२४ ओ स्थानीय तहओर १२७२ मतभार प्राप्त करले बटै ।
उहोर महिला ओरसेक सत्ता गठन्धनके समाजबादीके गरिमा शाह विजयी हुइल बटी । शाह प्रदेशसभाओर १८७२ मतभार ओ स्थानीय तहओर १९६२ मतभार पाके निर्वाचित हुइल हुइट । निकटतम प्रतिद्वन्द्वी एमाले उम्मेदवार सन्तोषकुमारी थापासे प्रदेशओरसे ५७६ ओ स्थानीय तहओर ११५२ मतभार प्राप्त करल हुइट । शाह नेकपा एकीकृत समाजवादीके केन्द्रीय सचिव तथा सुदूरपश्चिम इन्चार्जसमेत हुइट । उहाँ सत्ता गठबन्धनसे महिलाओरके उम्मेदवार रहिट ।
ओेस्टेक करके राष्ट्रियसभा सदस्यमे सुदूरपश्चिमसे दलितओर उम्मेदबार माओवादीके जगत पार्की विजयी हुइलै । माओवादीके पार्की गठबन्धनसे उम्मेदवार बनल रहिट । प्रदेशसभाओर १८७२ मतभार ओ स्थानीय तहओर १८९० मतभार पाके निर्वाचित हुइल हुइट । निकटतम प्रतिद्वन्द्वी एमाले उम्मेदवार नरेश विक प्रदेशओर ५७६ ओ स्थानीय तहओर १२०६ मतभार प्राप्त करले बटै ।
