मोटरसाईकल ओ अटो एकआपसमे टक्राके अटो चालकके मृत्यु
पहुरा समाचारदाता
पुनर्वास, १२ माघ । मोटरसाईकल ओ अटो रिक्सा एकआपसमे टक्राके अटो चालकके ज्यान गैल बा कलेसे पाँच जाने घाहिल हुइल बटै ।
बुधके कञ्चनपुरके पुनर्वास न.पा. ३ माईली बजारमे दुर्घटना हुइल रहे । बेलौरीसे धनगढी जैटी करल लु. २ स ००८१ नम्बरके अटो रिक्सा ओ विपरीत दिशासे अइटी रहल से. १ प ७६४४ नम्बरके मोटर साईकल एकआपसमे टक्राके दुर्घटना हुइल हो ।
दुर्घटनामे परके अटोरिक्सा चालक पुनर्वास न.पा. ८ क गाउँ के ३५ बर्षिय राजेन्द्र सुनार(मिजार) के उपचारके क्रममे कैलालीके धनगढी स्थित सेती प्रादेशिक अस्पतालमे उपचारके क्रममे मृत्यु हुइल ईलाका प्रहरी कार्यालय त्रिभुवनबस्तीके प्रहरी निरिक्षक कैलाश सिँह बिष्ट जानकारी करैैलै ।
दुर्घटनामे परके मोटरसाईकल चालक पुनर्वास न. पा. १ गणेशबस्ती बैठना ३० बर्षिय रामभजन राना, मोटर साईकलमे सवार उहे ठाउँके ३२ बर्षिय राधेश्याम राना, अटोमे सवार बेलौरी न. पा. १० भुडाके १३ बर्षिय बालक आकाश बि.क., उहृे ठाउँके १२ बर्षिय आशिष बि.क., सिद्धला बजार नगरपालिका ८ बर्दियाके ३२ बर्षिय रघुबीर सुनार, १४ बर्षिया करुणा सुनार ओ पुनर्वास न.पा. ८ खडडाके ७० बर्षिया पार्बती सुनार घाहिल हुुइल बटै ।
घाहिल मन्से आकाश वि.क. ओ रामभजनके अवस्था गम्भीर हुइटी रहल ओ धनगढीस्थित निसर्ग अस्पतालमे उपचार हुइटी रहल प्रहरी जनैले बा । और घाहिलके आईबिआरडीस्थित पुनर्वास पोलिक्लिनिकमे उपचार हुइटी रहल बा ।
