गेटा विमानस्थलके जग्गा अधिग्रहणके लाग सात बुँदे सहमति
पहुरा समाचारदाता
धनगढी, १३ माघ । कैलालीके गेटा विमानस्थलहे क्षेत्रीय विमानस्थलके रुपमे स्तरोन्नति करक लाग सात बुँदे सहमति हुइल बा ।
संस्कृति, पर्यटन तथा नागरिक उड्डयनमन्त्री प्रेमबहादुर आले, विमानस्थल प्रमुख रामकृष्ण भट्ट तथा गेटा विमानस्थल निर्माण तथा बस्ती व्यवस्थापन समन्वय समितिका संयोजक लोकराज भट्टबीच बुधके सात बुँदे सहमति हुइल हो ।
विमानस्थलके स्तरोन्नति तथा जग्गा अधिग्रहणके लाग आर्थिक बरस २०७८÷०७९ भित्रे घरजग्गा अधिग्रहण तथा स्तरोन्नतीके लाग आवश्यक स्रोत सुनिश्चितता कैके ओकरपाछे दुई बरसभित्रे मुआब्जा वितरणके व्यवस्था करे पर्र्ना, अधिग्रहण करेबर अधिग्रहणमे पर्ना सक्कु व्यक्ति, समुदायके अध्ययन कैके उचित मुआब्जाके व्यवस्था करजैना, अधिग्रहण करेबर सम्बन्धित परिवार, टोल विकास समिति ओ समन्वय समितिके दुई्दुई जाने आमन्त्रित कैके सहभागिताके सुनिश्चितता करजैना, मुआब्जा निर्धारण करेबर अधिग्रहण हुइना क्षेत्रबाहेक बजार मुल्यके आकलन कैके समयमे मुआब्जा वितरणके व्यवस्था मिलाइ पर्र्ना लगायत सहमति करल बा ।
ओस्टके मुआब्जा वितरणके सम्पन्नता नैहुइटसम घर जग्गाके भोगचलनमे कौनो फेन प्रकृतिके अवरोध नैकैना, नेपालके प्रचलित कानुन जग्गा प्राप्ति ऐन ओ पूर्वाधार विकास आयोजनाके लाग जग्गा प्राप्ति पुनर्वास तथा पुर्नस्थापना सम्बन्धि निती बमोजिम हुइना तथा विमानस्थलके स्तरोन्नतिके लाग टोल विकास समिति, समन्वय समिति ओ टोलवासीके ओरसे कौनो फेन बाधा अवरोध नैकैना सहमति हुइल गेटा विमानस्थल प्रमुख भट्ट जानकारी डेलै ।
उ विमानस्थल स्तरोन्नति तथा जग्गा अधिग्रहणके लाग नेपाल नागरिक उड्डयन प्राधिकरणसे एक अर्ब १५ करोड रुपैयाँ बजेट विनियोजन करले बा । क्षेत्रीय विमानस्थलके रुपमे गेटाहे विकास कैना २५८ दशमलव २५ बिघा जग्गा अधिग्रहण करे पर्र्ना गुरुयोजनाहे नागरिक उड्डयन प्राधिकरण सञ्चालक समितिके अध्यक्षसमेत रहल मन्त्री आले स्वीकृत करलपाछे सर्भेके काम आघे बह्रल हो । विमानस्थल स्तरोन्नतिके लाग परामर्शदाता कम्पनीके प्राविधिक टोली ड्रोनसे सर्भेके काम सुरु कैना बटाइल बा ।
