सुदूरपश्चिमके पाँच जिल्लाके जनसंख्या घटल

कैलालीके १.५३ ओ कञ्चनपुरमे १.३२ प्रतिशतसे बह्रल

पहुरा समाचारदाता
धनगढी, १४ माघ । नेपालके जनगणना २०७८ अनुसार सुदूरपश्चिम प्रदेशके पाँच जिल्लाके जनसंख्या घटल बा । जनसंख्या जिल्लामे बझाङ(–०.३०), बैतडी (–०.२५), डडेल्धुरा (–०.१८), डोटी (–०.२८) ओ अछाम(–१.०९) प्रतिशत बार्षिक जनसंख्या बृद्धिदर रहल बा ।

कलेसे कैलालीके १.५३ ओ कञ्चनपुरमे १.३२ प्रतिशतसे बार्षिक जनसंख्या बृद्धि हुइल बा । ओस्टेक प्रदेशके बाजुराके ०.२९, दार्चुलाके ०.१३ प्रतिशत बार्षिक जनसंख्या बृद्धि हुइल तथ्यांक विभागसे बुधके रोज सार्वजनिक करल तथ्यांकमे डेखल बा ।

२०६८ के जनगणनाअनुसार बझाङके जनसंख्या १ लाख ९५ हजार १५९ रहलमे जनगणना २०७८ अनुसार १ लाख ८९ हजार ९७ रहल बटै । १० बरषमे यी जिल्लामे ६ हजा ६२ जाने घटल बटै । बैतडीके जनसंख्या २ लाख ५० हजार ८ सय ९८ रहलमे अबसिक जनगणनामे ६ हजार ४९८ जाने घटके २ लाख ४४ हजार ४ सय केल रहल बा ।

डडेल्धुरामेफे पहिलेक जनसंख्या १ लाख ४२ हजार ९४ रहलमे अब्बे २ हजार ६ सय ७४ जाने घटके १ लाख ३९ हजार ४ सय २० रहल बा । ओस्टेक २०६८ के जनगणनाअनुसार अछाम जिल्लामे २ लाख ५७ हजार ४ सय ७७ जनसंख्या रहलमे अब्बे २ लाख २९ हजार ८ सय १६ जाने केल रहल बटै कलेसे सबसे २७ हजार ६ सय ६१ जाने घटल बटै ।

तथ्यांक विभागके अनुसार २०६८ के जनगणनामे कैलाली जिल्लामे ७ लाख ७५ हजार ७ सय ९ जनसंख्या रहलमे जनगणना २०७८ मे ९ लाख ११ हजार १५५ पुगल बा । १० बरसके यहाँ १ लाख ३५ हजार ४४६ जनसंख्या बह्रल बा ।

कञ्चनपुरमे ४ लाख ५१ हजार २४८ जनसंख्या रहलमे अब्बे ५ लाख १७ हजार ६४५ पुगल बा । यी जिल्लामे ६६ हजार ३९७ जाने बह्रल बटै । ओस्टेक २०६८ के जनगणनामे बाजुराके जनसंख्या १ लाख ३४ हजार ९ सय १२ रहलमे २०७८ के जनगणनामे १ लाख ३८ हजार ९ सय ९८ पुगल बा । दार्चुला जिल्लाके जनसंख्या १ लाख ३३ हजार २ सय ७४ रहलमे अबसिक जनगणनामे १ लाख ३५ हजार ५६ पुगल केन्द्रीय तथ्याङक विभाग जनैले बा ।

०६८ के जनगणनामे प्रदेशके जनसंख्या २५ लाख ५२ हजार ५१७ रहे कलेसे १० वर्षमे एक लाख ५८ हजार ७५३ बढके नेपालके जनगणना २०७८ अनुसार सुदूरपश्चिम प्रदेशके जनसंख्या २७ लाख नाघल बा ।

तथ्यांक विभागसे सार्वजनिक करल तथ्यांकअनुसार सुदूरपश्चिम प्रदेशके जनसंख्या २७ लाख ११ हजार २५० पुगल बा । प्रदेशमे सबसे ढेर जनसंख्या कैलालीमे ९ लाख ११ हजार १५५ ओ सबसे कम दार्चुलामे १ लाख ३५ हजार ५६ रहल बा ।

ओस्टेक प्रारम्भिक जनसंख्या २०७८ अनुसार कैलाली जिल्लाके १३ स्थानीय तह मन्से धनगढी उपमहानगरपालिकाके जनसंख्या २ लाख ४ हजार ७८८, चुरे गाउँपालिकाके जनसंख्या २१ हजार ४ सय ३७, गौरीगंगा नगरपालिकाके जनसंख्या ६४ हजार ३ सय २७, घोडाघोडी नगरपालिकाके जनसंख्या ८५ हजार ९ सय ८२, गोदावरी नगरपालिकाके जनसंख्या ९९ हजार ९ सय ७३, जोशपुर गाउँपालिकाके जनसंख्या ३७ हजार १ सय ६७, कैलारी गाउँपालिकाके जनसंख्या ५० हजार ४ सय ५७, लम्कीचुहा नगरपालिकाके जनंसंख्या ९० हजार ९ सय ४१, मोहन्याल गाउँपालिकाके जनसंख्या २१ हजार २ सय ८५ ओ टिकापुर नगरपालिकाके जनसंख्या ९० हजार १ सय १५ रहल बा ।