अवैध लागूऔषध सहित पक्राउ
पहुरा समाचारदाता
कञ्चनपुर,१४ माघ । कञ्चनपुर, दोधारा चाँदनी नगरपालिका–७ डम्बर चौराहसे तीन जनहनके पक्राउ कैगिल बा । डम्बर चौराह सडकसे ४ ग्राम ८ सय ५० मिलिग्राम अवैध लागूऔषध खैरो हेरोइन जैसिन विल्गैना पदार्थ सहित ३ जनहनहे शुकके सको प्रहरी पक्राउ करल हो ।
पक्राउ परलमे दोधारा चाँदनी नगरपालिका–७ बाबाथान बैठना २४ वर्षीय बिबेक रानामगर, २० वर्षीय रोक्की कना राहुन रानामगर ओ उहे नगरपालिका–६ शान्ति टोल बैठना १८ वर्षीय किशोर रहल बटै ।
दोधारा चाँदनी नगरपालिका–७ डम्बर चौराह बैठना प्रेमबहादुर बडुवालके म.२ प ५०८१ नम्बरके मोटरसाइकल चोरी हुइल कना खबर प्राप्त हुइटी की प्रहरी चौकी बाबाथानसे खटल प्रहरी ओइनहे सडकमे बैठल अवस्थामे फेला पारके जाँच करेबेर उ लागूऔषध तथा चोरी हुइल मोटरसाइकल फेला पारल हो । ओइन उपर थप अनुसन्धान हुइटी रहल ईलाका प्रहरी कार्यालय दोधारा कञ्चनपुर जनैले बा ।
ओस्टेक बाँके, नेपालगंज उपमहानगरपालिका–१६ जयसपुरसे करिब १९ ग्राम अवैध लागूऔषध ब्राउनसुगर जैसिन विल्गैना पदार्थ सहित उहे ठाउँ बैठना २६ वर्षीय अस्फान अन्सारीहे विफे रात प्रहरीसे पक्राउ करले बा ।
सीमा प्रहरी चौकी जयसपुर ओ लागूऔषध नियन्त्रण ब्यूरो नेपालगंजसे खटल संयुक्त टोलीसे उहाँहे उ पदार्थ सहित फेला पारी पक्राउ करल हो ।
ओस्टेक बारा, बिश्रामपुर गाउँपालिका–१ बटम चौकसे करिब २१ ग्राम ६ मिलिग्राम अवैध लागूऔषध ब्राउनसुगर जैसिन विल्गैना पदार्थ सहित भारत घर रहल ३२ वर्षीय नबाब अंसारीहे बिफेक साँझ प्रहरीसे पक्राउ करले बा ।
भारतसे नेपालओर अइटी रहल बिआर ०५ एपि ६०६४ नम्बरके मोटरसाइकलहे सिमा प्रहरी चौकी छतवासे खटल प्रहरी जाँच कैना क्रममे मोटरसाइकल चालक अंसारीहे उ पदार्थ सहित फेला पारके पक्राउ करल हो ।
