स्थापना दिवसमे स्वास्थ्य सामग्री वितरण
पहुरा समाचारदाता
धनगढी, १५ माघ । प्रेस सेन्टर नेपाल कैलाली अपन १८ औं स्थापना दिवसके अवसरमे पत्रकारहुकनहे मास्क वितरण करले बा । कोरोनाकालमे अग्रपंत्तिमे रहिके काम करना पत्रकारहुकनहे सेन्टरशनिच्चरके रोज मास्क वितरण करले रहे ।
प्रेस सेन्टर नेपाल कैलालीके अध्यक्ष तेजराज भट्ट पत्रकारहुक्रे कोरोनाके बेला फेन रिपोर्टिङ करेपरना बाध्यताहे ध्यान डेटि स्वास्थ्य सुरक्षाके लाग मास्क वितरण करल बटैलैं ।
सेन्टरके अध्यक्ष भट्ट नेपाल पत्रकार महासंघ कैलालीके अध्यक्ष हिमालय जोशीहे मास्क उपलब्ध कराके वितरण कार्यके सुरुवात करलैं । अध्यक्ष जोशी लगायत धनगढीके क्रियाशील पत्रकारहुकनहे मास्क वितरण करल हो । मास्क वितरणमे सहभागी पत्रकार सेन्टरहे धन्यवाद समेत व्यक्त करले रहैं ।
ओस्टेक, सेन्टरके १८ औं स्थापना दिवसके अवसरमे जिल्ला समन्वय समिति कञ्चनपुर कोभिडके बिरामीहुकनहे फलफूल तथा स्वास्थ्य सामग्री वितरण करले बा । कोभिड बिरामीहुकनके स्वास्थ्य लाभके कामना करटि प्रेस सेन्टर कञ्चनपुरसे स्थापना दिवसके अवसरमे महाकाली अञ्चल अस्पतालमे रहल बिरामीहुकनहे फलफूल तथा स्वास्थ्य सामग्री वितरण करल हो ।
प्रेस सेन्टर नेपालके केन्द्रिय सदस्य राजेन्द्र अवस्थी, नेकपा माओवादी केन्द्रके सुदूरपश्चिम प्रदेश समिति सदस्य दुर्गा भट्ट, शुक्लाफाँटा नगरसमितिके सचिव दीपकराज भट्ट, कञ्चनपुर प्रेस सेन्टरके जिल्ला अध्यक्ष अरुण भट्ट लगायतके पदाधिकारीहुक्रे महाकाली अञ्चल अस्पतालमे रहल आइसोलेसनके बिरामीहुकनहे स्वास्थ्य सामग्री सहित फलफूल वितरण करल हो । देशभर टमान कार्यक्रम कैके प्रेस सेन्टर नेपाल अपन १८ औं स्थापना दिवस मनैले बा ।
