शैक्षिक क्रियाकलाप भौतिक उपस्थितिमे नैकैना आग्रह

पहुरा समाचारदाता
धनगढी, १५ माघ । जिल्ला प्रशासन कार्यालय कैलाली शैक्षिक क्रियाकलाप भौतिक उपस्थितीमे नइकरके भर्चुअल वा वैकल्पिक शिक्षण सिकाई विधिसे संचालन कैना आग्रह करले बा ।

शनिच्चरके रोज प्रमुख जिल्ला अधिकारी किरन थापासे आदेश जारी करटी शैक्षिक क्रियाकलापके भर्चुअल वा वैकल्पिक शिक्षण सिकाई विधिसे संचालन कैना आग्रह करल रहिट ।

नेपाल सरकार शिक्षा विज्ञान तथा प्रविधि मन्त्रालयसे जारी हुइल अनुसार हालहे भौतिक उपस्थितिमे संचालन नइकरके भर्चुअल वा वैकल्पिक शिक्षण सिकाई विधिसे संचालन कैना प्रजिअ थापा आग्रह करल हुइट । ओस्टेक विद्यालयमे कैना कहल कोभिड विरुद्धके खोपके कार्यक्रमके सम्बन्धमे स्वास्थ्य कार्यालयसंगके समन्वयमे सम्बन्धित स्थानीय तहके निर्णाय अनुसार खोप प्रयोजनके लाग केल संचालन कैना कहल बा ।

ओस्टेक सपिङ मल, डिपार्टमेन्टल स्टोर, सुपर मार्केत वा अन्य मेरिक पसलमे एक चो २५ से ढेर जमा नइहुइना, सिनेमा हल, डान्स बार, दोहोरी, नाँचघर, क्लव, हेल्थ क्लव, जिम खाना, फुटसल जैसिन मनैनके भिडभाड हुइना कार्यक्रमके हकमे ५० प्रतिशत केल उपस्थितीमे कैना प्रजिअ थापा आग्रह करलै ।