थारु लेखक संघसे एक स्रष्टाहे सम्मान कैना
पहुरा समाचारदाता
धनगढी, १६ माघ । थारू लेखक संघ नेपाल धनगढी कैलाली ‘थारू साहित्य पुरस्कार २०७८’ से मौलिक तथा सांस्कृतिक गीत संगीत विधामे एकजाने स्रष्टाहे सम्मान कैना हुइल बा ।
धनगढीमे बैठल कार्यसमितिके बैठकसे अइना फागुन ११ ओ १२ गते कञ्चनपुरमे हुइना छैठौं राष्ट्रिय थारू साहित्य सम्मेलनमे उ स्रष्टाहे सम्मान कैना जनाइल हो । संघके अध्यक्ष सीताराम चौधरी थारु, साहित्य, संस्कृति तथा गीत संगीत क्षेत्रमे महत्वपूर्ण योगदान पुगुइया स्रष्टाहे सम्मान कैना बटैलै । उहाँ संघसे स्थापना करल अक्षय कोषके ब्याज रकमसे नगद १५ हजार ५५५ नगद पुरस्कार सहित प्रमाणपत्रसे सम्मान कैना जनैलै ।
यकर लाग संघसे पुरस्कारके लाग इच्छुक कृतिकारहे इहे माघ २९ गते भिट्टर आपन गायन, लेखन तथा संकलन करल सम्पूर्ण मौलिक तथा सांस्कृतिक गीत संगीतके अडियो तथा भिडियोके प्रतिलिपि सहित मनोनय दर्ताके लाग अनुरोध करले बा ।
संघसे जारी करल सूचनामे मौलिक तथा सांस्कृतिक गीत संगीतमे अब्बल, क्षमतावान, योग्य स्रष्टाहे प्राथमिकता डेना, स्रष्टा थारु समुदायमे लोकप्रिय एवं स्वच्छ छवि रहल, देश तथा विदेशमे रहल थारु भाषाके मौलिक तथा सांस्कृतिक गीत संगीतके स्रष्टाहे किल समावेश कैना लगायतके मनोनयन दर्ताके मापदण्ड फेन निर्धारण करले बा ।
ओस्टके विवादित कृतिहे मूल्यांकन प्रक्रियामे समावेश नैकरजैना, समयावधिभिट्टर दर्ता हुइल स्रष्टाहे किल मूल्यांकन प्रक्रियामे समावेश कराके सर्वोत्कृष्ट एकजाने स्रष्टाहे किल नगद पुरस्कार तथा प्रमाणपत्र सहित सम्मान कैना उल्लेख रहल बा ।
थारू भाषा, साहित्य, कला ओ संस्कृति आदि विधामे कलम चलाके थारू वाङ्गमयमे महत्वपूर्ण योगदान पुगुइया लेखक, स्रष्टा, साहित्यकार, कलाकार एवं अनुसन्धान कर्ताहे सम्मान तथा पुरस्कार प्रदान कैना उद्देश्यसे संघ २ लाख २५ हजारके अक्षय कोष स्थापना करले बा । उ अक्षय कोषके वार्षिक ब्याजके कम्तीमे २५ प्रतिशत रकमसे प्रत्येक बरस एकजाने स्रष्टाहे सम्मान कैना अध्यक्ष चौधरी बटैलै ।
संघसे प्रदान करुइया पुरस्कारके अन्तिम निर्णय संघके साहित्य पुरस्कार निर्देशिका बमोजिम गठन हुइल मूल्यांकन समितिके अन्तिम निर्णय नै सर्वमान्य हुइना जनाइल बा ।
संघसे गैल बरस सुर्खेतमे चैत्र २१ ओ २२ गते हुइल पाँचौ राष्ट्रिय थारु साहित्य सम्मेलनमे साहित्य विधामे नगद ११ हजार १११ सहित एक जाने स्रष्टाहे सम्मान करल रहे ।
